येँ महानगरपालिकाया बजेट १६ अर्ब ४२ करोड ७३ लाख
- नेपालभाषा टाइम्स
- ११४० दिल्लाथ्व चौथी
- किपा-Sharn Hari Jyapu
येँ – (नेपालभाषा टाइम्स) – येँ महानगरपालिकां वइगु आर्थिक २०७७-७८ या निंतिं १६ अर्ब ४२ करोड ७३ लाख २६ हजार तकाया
बजेट सार्वजनिक याःगु दु। येँ मनपां वंगु आर्थिक दँ २०७६-७७ स्वयां निगू अर्ब अप्वयेका बजेट हःगु खः ।
येँ महानगरपालिकाया उपप्रमुख हरिप्रभा खड्गी श्रेष्ठं म्हिगः राष्ट्रिय सभागृहय् जूगु बजेट सभाय् वइगु आर्थिक दँया बजेट न्ह्यब्वयादीगु खः । उपमेयर खड्गी न्ह्यब्वयादीगु मुक्कं बजेटया ११ प्रतिशत कार्यालय सञ्चालन व प्रशासनिक विनियोजन यानातःगु दु। ५१ प्रतिशत बजेट धाःसा पूर्वाधार विकास ज्याझ्वलय् खर्च यायेगु कथं विनियोजन यानातःगु दु। उकथं हे सामाजिक विकासया निंतिं १५.२२ प्रतिशत, सुशासन व अन्तर सम्बन्धया निंतिं ५.८६ प्रतिशत, सशर्त अनुदानया निंतिं १५.६८ प्रतिशत, आर्थिक विकासया निंतिं १ दशमलव ५ प्रतिशत बजेट विनियोजन यानातःगु दु ।
येँ महानगरपालिकां न्ह्यब्वःगु बजेटय् कोरोना भाइरसया कारणं छेँय् बालंच्वंपिंत लछि तकया क्वथाबाः छुट बिलधाःसा छेँथुवाःयात दछिया बहाल कर छुट बीगु घोषणा यानातःगु दु। उकथं हे २०७६-७७ पुलेमाःगु छेँबहाः कर चुक्ता यात धाःसा करय् १० प्रतिशत छुट बीगु खँ बजेटय्न्ह्य थनातःगु दु ।
उकथं हे कोरोना भाइरसया कारणं थीथी व्यवसायय् लाःगु प्रभाव म्हो यायेगु निंतिं विशेष योजना घोषणा याःगु दु। थुगु योजना कथं मू प्राथमिकता होटल व पर्यटन क्षेत्रलिसे स्वाःगु उद्योगयात बीगु बजेटय् न्ह्यथनातःगु दु। येँ सञ्चालन जुयाच्वंगु होटेल, रिर्सोटयात आर्थिक दँ २०७६-७७ तकया घरजग्गा कर-सम्पत्ति कर चुक्तायात धाःसा आर्थिक दँ २०७७-७८ या सम्पत्ति करय् थप ७५ प्रतिशत कर छुट बीगु घोषणा येँ मनपां याःगु दु ।
उकथं हे येँ महानगरपालिका दुने व्यापार व्यवसाय यानाच्वंपिं करदातापिंत व्यवसाय करय् ५० प्रतिशत छुट बीगु घोषणा नं बजेट यानातःगु दु। येँ मनपां आर्थिक दँ २०७७-७८ य् पुलेमाःगु व्यवसाय करय् होटल, पर्यटन तथा मनोरन्जन क्षेत्र लिसे सम्बन्धित व्यवसायी पुलीगु व्यवसाय करय् ५० प्रतिशत व मेगु व्यवसाय यानाच्वंपिंसं पुलीगु करय् २० प्रतिशत छुटया व्यवस्था याःगु दु ।
अथेहे येँ महानगरपालिकां थुगुसीया बजेटय् स्वास्थ्य क्षेत्रयात मू प्राथमिकता बिउगु दु। विशेष यानाः कोरोना रोकथाम व थुकिं लाइगु प्रभाव न्युनीकरण यायेगु ज्याझ्वः दुथ्याकातःगु दु ।
उकथं हे विशेष महत्वया विषय अन्तर्गत येँ महानगरपालिकाया कार्यालय भवन दयेकेगु, भर्टिकल पार्किब भवन दयकेगु, पर्यटन पदमार्ग विकास यायेगु, कोटेश्वर तीनकुनेय् बुद्ध पार्क दयेकेगु, मेघा हल दयेकेगु आदि खँ नं बजेटय् दुथ्याकातःगु दु। अथेहे सम्बृद्धिया निंतिं सहकारी अभियान, एकीकृत सीप विकास ज्याझ्वः, मेडइन काठमाडौं, जीवन निर्वाहयाया निंतिं पारिश्रमिक ज्याझ्वः लिसे युवा लिसे मेयर ज्याझ्व व वडा वडाय् मेलमिलाप शिविर सञ्चालन यायेगु खँ नं बजेट प्राथमिकता बियातःगु दु ।
यल मनपाया ४ अर्ब ७९ करोडया बजेट
यल महानगरपालिकां म्हिगः वइगु आर्थिक दँया निंतिं ४ अर्ब ७९ करोड १५ लाख ६२ हजार तकाया बजेट सार्वजनिक याःगु दु। म्हिगः यल मनपाया मेयर चिरीबाबु महर्जनं बजेट सार्वजनिक यानादीगु खः ।
मेयर महर्जनं सार्वजनिक यानादीगु बजेटय् कोरोना भाइरसया कारणं क्षति जूगु अर्थतन्त्रयात थकायेत विशेष नीति कयागु खँ न्ह्यथनातःगु दु। वय्कलं कोरोना संक्रमण न्यनेमबित याःगु लकडाउनया इलय् थीथी करय् १० प्रतिशत छुट बीगु घोषणा यानादीगु दु ।
बजेट सार्वजनिक यायेगु झ्वलय् मेयर महर्जनं सम्पत्ति करय् कडा रूपं न्ह्याःवनेगु खँ धयादीगु दु। वय्कलं थीथी सरकारी वा निजी ज्या यायेमाल धाःसा सम्पत्ति कर चुक्ता अनिवार्य पेश यायेमाःगु नीति नालेगु जानकारी नं बियादीगु दु ।
LEAVE YOUR COMMENTS