डर्टमुन्डयात बुका: बायर्न उपाधिपाखे

बर्लिन (एजेन्सी) – जोसुआ किमिचया उत्कृष्ट गोलया ग्वाहालिं जर्मन बुंडेसलिगाय् बायर्न म्युनिखं मंगलवा: बहनि बोरुसिया डर्टमन्डुयात १–० बुकूगु दु । थ्व कासा त्यायेवं बायर्न झ्वलाक च्याक्व:गु लिग उपाधिया लिक्क नं थ्यंगु दु । लिगय् खुगु चरणया कासा जक ल्यं दुबलय् बायर्नं न्ह्युगु ल्या:या ठोस अग्रता का:गु दु । किमिचं न्हापांगु हाफ क्वचाये न्ह्य: चिपया ग्वाहालिं गोल या:गु ख: । आ: बायर्नया ६४ ल्या: जूगु दुसा डर्टमुन्ड ५७ ल्याखय् हे सीमित जुल । नोभेम्बरय् बायर्नया घरेलु मैदानय् जूगु कासाय् नं वं डर्टमुन्डयात अपुक हे ४–० बुकूगु ख: । मंगलवा: बहनिया मेगु कासाय् वोल्भ्सबर्गं बायार लेवरकुसनयात ४–१ बुकल । अथेंतु आइनट्राख्ट फ्रान्कफुर्ट व फ्राइबर्गले ३–३, अले भेरडाआ ब्रेमन व बोरुसिया मुन्छेनग्लाडबाखें गोलरहित बराबरी म्हितल ।