सम्पदा पुनर्निर्माण ज्या न्ह्याकेत्यनागु दु
येँ महानगरपालिका १८ वडाया न्हूगु भवन कन्हय् शनिवाः उलेज्या जुइत्यंगु दु । न्यतया आयुर्वेदिक अस्पताल लिक्क च्वंगु थ्व भवन व १८ वडापाखें याना वयाच्वंगु ज्यायात कयाः वडाअध्यक्ष भाजु न्हुछेकाजी महर्जनलिसे जूगु संक्षिप्त खँल्हाबल्हा ः
छिगु वडाया न्हूगु वडाभवन दयेकूगु दु । थ्व भवनया स्वरुप गथे दु व थुकिया लागत गुलि दु ?
– २०७२ सालया तःभुखाचं पुलांगु वडाभवन क्षति जूगुलिं थ्व भवन पुनःनिर्माण जूगु खः । थ्व भवन दयेकेगु निंतिं येँ महानगरपालिका अन्तर्गतया हनुमानढोका दरवार क्षेत्र संरक्षण कार्यक्रमपाखें बजेट वःगु खःसा बछि ब्व टायल तिकेगु ज्या वडाया बजेटं यानागु खः । थ्व भवन दयेकेत थ्यंमथ्यं ६० लाख तका तूगु जुल । थ्व भवन पूर्ण रुपं सम्पदामैत्री जुइक दयेकागु दु ।
वडा भवनय् वडाया ज्याकू बाहेक मेगु छु छु ज्याकू दइ ?
– वडाया ज्याकू बाहेक थ्व भवनय् शहरी जनस्वास्थ्य क्लिनिक संचालन जुयाच्वंगु दु । थन साधारण स्वास्थ्य सेवा, म्इत्क्, परिवार नियोजनया अस्थायी साधन नापं इलय् ब्यलय् स्वास्थ्य शिविर, स्वास्थ्य सम्बन्धी जनचेतना ज्याझ्वः याना वयाच्वनागु दु ।
छिकपिं निर्वाचित जुया वयेधुंकाः वडा दुनेया भौतिक निर्माणय् छु गज्याःगु ज्या जूगु दु व भविष्यया योजना छु छु दु ?
– वडा दुने लाःगु मू लँ फुक्कथासय् नं कालोपत्रे –पीच) यायेगु ज्या क्वचायेके धुनागु दु । गल्ली, चुक ल्ह्वनेज्या जुयाच्वंगु दुसा आः सम्पदा पुनःनिर्माण यायेगु ग्वसाः जुयाच्वंगु दु ।
सामाजिक, सांस्कृतिक विकासया लिसें स्वास्थ्य सम्बन्धी वडापाखें गज्याःगु ज्या जुयाच्वंगु दु ?
सामाजिक ख्यलय् मिसा शीपमूलक तालिम ज्याझ्वः, थीथी खलःपुचः नाप सहलह ब्याकाः सचेतना ज्याझ्वः यान ावयाच्वनागु दु । अथेहे थीथी खलःपुचःतय्सं याइगु ज्यायात नं ग्वाहालि याना वयाच्वनागु दु । अथेहे सांस्कृतिक विकासया ख्यलय् थीथी खलःपुचःतय्त बाजं न्यायेत, स्यनेत बजेट बिया च्वनागु दु । नापं वय्कःपिंसं सयेकाच्वंगु सांस्कृतिक ज्यायात दँय् छक्वः ब्वयेगु, क्यनेगु ग्वसाः ग्वया वयाच्वनागु दु । स्वास्थ्य ख्यलय् जेष्ठ नागरिकपिंत छेँय् छेँय् वनाः स्वास्थ्य परीक्षण यायेगु ज्या याना वयाच्वनागु दु । जेष्ठ नागरिक, मनोरञ्जन सेवा केन्द्र चायेकातयागु दु । धार्मिक भ्रमण, बाखं कनेगु ज्याझ्वः नं जुयाच्वंगु दु । नापं प्रशासनिक क्षेत्रय् चुस्त दुरुस्त व भ्रष्टाचार मुक्त सेवा बिया वयाच्वनागु दु ।
जनप्रतिनिधि कथं निर्वाचित जुया वयेधुंकाः वडां बीगु सेवाय् वडावासीतय्सं न्हापा स्वयाः गुलि तक भिन्नता महसुस यानाच्वंगु तायेका ?
– वडापाखें याना वयाच्वंगु ज्याया बारे च्वय् नं न्ह्यथने धुन । आः वडां यानाच्वंगु ज्याय् गुलितक भिन्नता महसुस जू धयागु खँ वडावासीपिंसं हे धायेफइ । वय्कःपिनिगु बिचाः कयादीसा बांलाइ ।
जेष्ठ नागरिक भत्ताया बारे छु दु ?
– जेष्ठ नागरिक भत्ताया बारे बैंकया कर्मचारी वडाया ज्याकुथिइ हे ब्वना हयाः भत्ता इनेगु यानाच्वनागु दुसा उसाँय् मदुपिनिगु हकय् छेँय् छेँय् हे वनाः लःल्हायेगु याना वयाच्वनागु दु । अय्नं छुं छुं समस्या दयाच्वंगु दु ।
LEAVE YOUR COMMENTS