तःजिक क्वचाल ‘स्वयम्भू महोत्सव’
येँ – येँ महानगरपालिकाया मेयर विद्यासुन्दर शाक्यं विश्व सम्पदाय् दुथ्यानाच्वंगु येँया थीथी थाय्या म्हसीकायात विश्वन्यंकं पिब्वयेगु निंतिं येँ महानगर क्रियाशील जुयाच्वनागु खँ धयादीगु दु। लिसें वय्कलं विश्व सम्पदाय् दुथ्याःगु पर्यटकीय थाय्या प्रवद्र्धनय् सकलें न्ह्याः वनेमाःगु खँय् नं बः बियादिल ।
वंगु मंगलवाः थनया स्वयम्भू भुइख्यलय् ग्वसाः ग्वःगु छवाःयंकंया ‘स्वयम्भू सांस्कृतिक महोत्सव’ समापन ज्याझ्वलय् नवासे मेयर शाक्यं येँ देय् आन्तरिक व वाह्य पर्यटनया निंतिं तःधंगु सम्भावना दुगु थाय् जूगु न्ह्यथनादिसें, थुकीयात महानगरया ज्याझ्वलय् दुथ्याकतइगु जानकारी नं बियादिल ।
येँ महानगरपालिकाया प्रवक्ता नापं १५ वडाया अध्यक्ष ईश्वरमान डंगोलं महोत्सवय् वडाबासी दथुइ आपसी सद्भाव दयावःगु उल्लेख यासे थुकिं थः तसकं उत्साहित जुयागु धयादिल । ‘विश्व सम्पदा लागा स्वयम्भूया ऐतिहासिकता, मौलिकता, धार्मिक सहिष्णुता व स्थानीय जातिया बिविधताया प्रचार यानाः पर्यटन प्रवद्र्धन यायेगु तातुनाः गुगु महोत्सव शुरु यानागु खः, व तातुना पूवंगु दु’, अध्यक्ष डंगोलं धयादिल ।
ज्याझ्वलय् महानगरीय प्रहरी ज्याकू रानीपुखूया प्रमुख प्रहरी नायव महानिरीक्षक बिश्वराम पोखरेलं प्रहरी व जनता छगू हे खः धासें प्रहरी खनाः जनता ग्यायेमाःगु अवस्था मदु, नागरिक व जनता दथुइ फरक मदुसकलें मिले जुयाः ज्या याये फइगु सन्देश थुगु महोत्सवं बिउगु दुधयादिल ।
वडा सदस्य एवं वडा शिक्षा समितिया संयोजक आनन्द गौतमं ज्याझ्वः उपलब्धीमूलक जूगु व थःपिंसं कयागु लक्ष्य पूवंकागु धासें महोत्सवं स्वयम्भूयात राष्ट्रिय व अन्तर्राष्ट्रिय क्षेत्रय् परिचित यायेत ग्वाहालि याःगु धयादिल ।
ज्याझ्वलय् सहरी विकास राज्यमन्त्री रामवीर मानन्धर, संघीय सांसद जीवनराम श्रेष्ठ, रेञ्जर रेजिमेन्ट प्रमुख, महासेनानी युधिर सिंह अधिकारी, जगदल प्रमुख, प्रमुख सेनानी चुलेन्द्र थापा, स्वयम्भू व्यवस्थापन तथा संरक्षण महासमितिया अध्यक्ष सर्वज्ञरत्न तुलाधरलगायतं मोहत्सवया थीथी पक्षयात कयाः नुगः खँ प्वंकादीगु खः ।
‘स्वयम्भू जाउँ, नेपाल पर्यटन बर्ष मनाऔं’ नारा ज्वनाः पुस १६ गते निसें न्ह्याःगु मोहत्सव येँ महानगरपालिका १५ वडा व महानगरीय प्रहरी वृत्तया मंकाः ग्वसालय् जूगु खः ।
नेपाल भ्रमण वर्ष व येँ देय्यात सांस्कृतिक सहरया रुपय् परिचित यायेगु ल्याखं छवाःयंकं ग्वसाः ग्वःगु ज्याझ्वलय् ४७गू घरेलु व हस्तकला, नसा स्टलत तयातःगु खःसा नेपाली सेना, नेपाल प्रहरी, शसस्त्र प्रहरीनापं राष्ट्रिय व स्थानीय कलाकारं सांस्कृतिक ज्याझ्वः न्ह्यब्वःगु खः । महोत्सव समापन जुइ न्ह्यः वसन्तपुरनिसें स्वयम्भू निगू विश्वसम्पदा क्षेत्र स्वाइगु सम्पदा मार्गय् पैदयात्रा नं याःगु खः ।
LEAVE YOUR COMMENTS