विप्लवया न्याम्ह दुजः येँनं ज्वन

येँ – प्रहरीं नेकपा ‘विप्लव’ पुचःया केन्द्रीय दुजः सहित न्याम्हेसित ज्वंगु दु । नेपाल प्रहरीया विशेष ब्युरों येँया थीथी थासं उमित ल्वाभः व विष्फोटक पदार्थ सहित ज्वंगु खः । ज्वंपिं मध्ये विप्लवया केन्द्रीय दुजः सन्दिप लामा, (शिशिर), केन्द्रीय कोषाध्यक्ष तिलकबहादुर गुरुङ, केन्द्रीय कार्यालय सचिव वकिल घर्तीमगर (खनिल), सोलुखुम्बु जिल्ला इन्चार्ज त्रिलोचन विक व उदयपुर जिल्लाया दुजः दुर्खा बहादुर तामाङ जूगु खँ प्रहरीं धाःगु दु ।
प्रहरीं उमिगुपाखें ब्याट्री, तार, छपु पेस्तोल व थीथी भ्वं बरामद जूगु खँ धाःगु दु । प्रहरीया कथं उमिसं थीथी थासय् बम विस्फोट यायेगु व चन्दा म्हयेगु तयारी यानाच्वंगु अवस्थाय् ज्वंगु खः । ज्वंपिं मध्ये शिशिर धाइम्ह सञ्जीव लामा वैदेशिक रोजगार व्यवसायी संघया तत्कालीन अध्यक्ष रोहन गुरुङया छेँय् विस्फोट याकेगु ज्याया मू योजनाकार खँ धाःगु दु । अथे हे यलं नं छम्ह कार्यकर्तायात ज्वंगु दु ।

विप्लवपाखें अपहरण
थ्वहे झ्वलय् नेपाल कम्युनिष्ट पार्टी विप्लवया कार्यकर्तां दैलेख जिल्लाया ठाँटीकाँध गाउँपालिकाया अध्यक्ष व वया जहानयात वंगु शनिवाः चान्हय् अपहरण याःगु दु । अध्यक्ष धीरबहादुर शाही व वया जहान इला मल्लयात थःगु छेँनं अपहरण यानायंकूगु खः । लिपा जहानयात लँय् दथुइ हे त्वःता बिल । कर्णाली प्रदेशया डीआईजी पूर्णचन्द्र जोशीं घटनाया पुष्टि यासें शाहीयात मालेगु ज्या जुयाच्वंगु खँ धाःगु दु । प्रहरीया कथं शाहीयात कालिकोटपाखें यंकूगु खः ।
प्रहरीं शनिवाः चान्हय्निसें शाहीयात मालेगु ज्या जुयाच्वंगु जानकारी बिउगु दु । शाहीया किजायात नं नापं यंकूगु खःसां निघौ लिपा शाहीया जहान व किजायात त्वःता थकूगु खँ धाःगु दु । प्रहरीं लिपा अध्यक्ष धीरबहादुरयात नं उद्धार याःगु खँ धाःगु दु ।