महाद्यः–पार्वती देगः – पुरातत्वं न दन, न दने बिल

येँ – येँया हनुमानध्वाखा लागाया छगू आकर्षक सम्पदा जुयाच्वंगु महाद्यः–पार्वती देगः जीर्णोद्धार यायेगु लागिं पुरातत्व विभागं वास्ता मयाःगु खँ पिहां वःगु दु । २०७२ सालया तःभुखाचं क्षति जूगु उगु देगःयात आः प्यखेरं आः तू नकाः धस्वाकातःगु दु । तर भुखाय् ब्वःगु प्यदँ दयेधुंकलं नं उगु देगः जीर्णोद्धार यायेगु सवालय् धाःसा आः तक पुरातत्वं ध्यान तकं मबिउगु खँ सीदुगु दु ।

विदेशी पर्यटकत नं यक्वं वइगु थाय् जूगुलिं थ्व देगः पुनर्निर्माणया ज्या थम्हं याना बी धकाः येँ महानगरपालिकां तःगु प्रस्तावयात तकं पुरातच्वं अस्वीकार याःगु खँ सीदुगु दु । सीदुकथं थौंकन्हय् तू नकातःगु कुमारीछेँ जीर्णोद्धार याना बी धकाः येँ महानगरपालिकां तःगु प्रस्तावयात नं पुरातत्वं अस्वीकार याःगु खः ।

पुरातत्वपाखें थम्हं नं मदयेकेगु व मनपायात नं दयेके मबीगु कथं पंगः थनाच्वंगु द्वपं मनपाया पदाधिकारीतय्सं बिउगु दु । थ्वहे झ्वलय् थ्व देगःया नामय् तयातःगु सलंसः रोपनी जग्गा गुथि संस्थानं बेपत्ता याना बिउगु मेगु तथ्य नं पिहां वःगु दु । देगःया द्यःपाःमि भाजु इन्द्रमान श्रेष्ठं कनादीकथं थ्व देगःया नामय् ३१५ रोपनी जग्गा आयस्ता कथं तयातःगु खः ।

गुथि संस्थानं थुकी मध्ये अधिकांश जग्गा मियाबीधुंकूगु दु । आः गुलि ल्यं दनि धकाः छुं ई न्ह्यः थःपिंसं स्वः वनाबलय् आः १३५ रोपनी ल्यं दनि धकाः रेकर्ड क्यना हःगु खँ नं द्यःपाःमि श्रेष्ठं कनादिल । तर थ्व जग्गा गन गन दु धइगु खँ धाःसा धाःगु मदुनि । थुलि जग्गा वापत गुथिं उगु देगः दुने द्यः पुज्यायेगु लागिं दँय् केवल न्याद्वः–खुद्वः दां जक बीगु यानाच्वंगु खँ नं भाजु श्रेष्ठं कनादिल ।

थ्व देगः दुने नवयोगिनी द्यः पलिस्था यानातःगु दु । न्हिंन्हिं द्यःया पुजा यायेमाः । मोहनिबलय् धाःसा थ्व द्यः न्हिछि हे खुल्ला जुइ । अन द्यः पुज्याइपिं व रेखदेख याइम्ह द्यःपाःमियात सरकारं दँय् न्याद्वः–खुद्वः दांलिसें म्येय् निम्ह व दुगु प्यम्ह बीगु यानाच्वंगु दु । द्यःपाःमि श्रेष्ठं वर्तमान बजाःभाः कथं थ्व दां मगाःगु खँ कनादीगु दु ।

सम्बन्धित बुखँ

LEAVE YOUR COMMENTS