मिसापिनि सुविधाया सफूचा नेवाः भासं

येँ – सरकारं मिसापिंत बियातःगु थीथी कथंया सुविधा सम्बन्धी सुचंया मुना नेवाः भासं नं पिहां वइगु जूगु दु । राष्ट्रिय सूचना आयोगं नेवाः भाय्या उगु सफूचा पिकायेत्यंगु खः । आयोगं खस नेपाली भासं थ्व सफूचा तयार याना तःगु खःसां थीथी भासं पिकाल धाःसा यक्व थासय् थ्यनीगु व आवश्यकपिं मिसापिंत सूचना दइगु आशा यासें आयोगं नेपालभाषां नं उगु सफूचा पिकायेत्यंगु खः । म्हीग शनिवाः राष्ट्रिय सूचना आयोगया आयुक्त यशोदा तिम्सिनां उगु अनुवादया विमोचन यानादीगु खः ।

आदिवासी जनजाति पत्रकार महासंघ (फोनिज) येँ शाखां १०८ क्वःगु अन्तर्राष्ट्रिय मिसा दिवसया लसताय् याःगु जनजाति मिसा पत्रकार भेलाय् उगु सफूचा नं विमोचन जूगु खः । फोनिज येँ शाखाया नायः मीरा राजभण्डारी अमात्यया सभापतित्वय् जूगु ज्याझ्वलय् सुदूर पश्चिमं न्हापांगु न्हिपौ पिकाःम्ह मिसा पत्रकार लोग्शरी कुँवर व अपांगता दुपिं मिसापिं पत्रकारत गण्डकी एफएमया प्रविना गोले व नेवाः एफएमया अनिता महर्जनयात हनेगु ज्या नं जूगु खः । ज्याझ्वलय् न्यूनतम पारिश्रमिक निर्धारण समिति, नेपाल पत्रकार महासंघ, प्रेस युनियन, प्रेस चौतारी, क्रियाशील पत्रकार महिला लगायत पत्रकार व पत्रिका सम्बन्धी थीथी संघ संस्थाया पदाधिकारीपिंसं नं नुगःखँ प्वंकादीगु खः ।