अम्बःया गुण

अम्बःयात आयुर्वेदय् अमृत समान भाःपियातःगु दु । प्रकृतिं थुकियात गुलिखे ल्वय्यात हांनिसें ल्यहेँ थनेफइगु शक्ति बियातःगु दु । आः ला विज्ञानं नं थुकिया चमत्कारी गुण व फाइदायात स्वीकार याःगु दु । अम्बलय् प्रशस्त मात्राय् एन्टिअक्सिडेन्ट दु । पोटासियम, क्याल्सियम, कार्बोहाइड्रेट, फाइबर, म्याग्नेशियम, आइरन, भिटामिन सीया लिसें थुकी डाययुरेटिक एसिड, भिटामिन एबि कम्प्लेक्स नापं थीथी खनिजतत्व नं दु । खास खँ ला थ्व खः कि क्वाकल धाःसां नं थुकिया तत्व नष्ट जुइमखु । थ्व कमालया वासः खः । योग्य चिकित्सकया सल्हा कयाः छ्यल धाःसा अम्बःपाखें झी यक्व हे ल्वय् जुइगुपाखें बचय् जुयाच्वनेफइ । अम्बः झीसं अचार, जूस, सुखू, चूर्ण, आदि न्ह्यागु रुपय् नं नयेफइ ।

मिखाया निंतिं
अम्बःया रस मिखाया निंतिं तसकं फाइदाजनक जू । थुकिं मिखा त्यय्लाकी । मोतिबिन्दू, कलर ब्लाइन्डनेस व रतौंधी (सँकां) वा मिखां मछुइगु जुयाच्वन धाःसा न्हिं निगू चम्चा अम्बःया जूसया सेवन यानादिसँ ।

पचय् यायेत
अम्बलं मेटाबोलिक क्रियाशीलता थकाइ, गुकि झीत स्वस्थ यानातयेत ग्वाहालि यानाच्वनी । अम्बलं नयागु नसा पचय् यायेत नं ग्वाहालि याइगु जूगुलिं जा नयेबलय् अम्बःया अचार छता नं तयाः नयेगु याःसा बांलाः ।

नुगःस्येँ बल्लाइ
अम्बःया नियमित सेवनं नुगःस्येँ बल्लाइ । अम्बलं नुगःस्येँय् हि दुहांपिहां जुइगु हिनुलिइ वइगु पंगःयात चिइकाछ्वइ । थुकी एन्टि अक्सिडेन्टया रुपय् एमिनो एसिड व पेक्टिन दइ । उकिं कोलेस्ट्रोल दयेकेबीमखु । अले नुगःस्येँया मांसपेशीयात नं बल्लाकी । थुकिया निंतिं अम्बःया रस छ्यःसा बांलाः ।

प्रजनन सम्बन्धी समस्या
अम्बः प्रजनन सम्बन्धी समस्याया निंतिं नं ज्या वः । थुकी दुगु खनिजं मिजंतय्के शुक्राणु व मिसातय्के अण्डाणुया ल्याः अप्वयेकेगु व नियन्त्रित यायेगु ज्या यानाच्वनी । खास खँ थ्व खः कि थुकिया प्रभावं अण्डाणु व शुक्राणु स्वस्थ जुइ । गुकिं यानाः प्रजनन क्षमता अप्वइ । महिनावारी अनियमित जुइगु समस्या दुसा मिसातय्सं अम्बःया नियमित सेवन यानाः फाइदा कायेफइ ।

क्वँय् स्याःसा
थौंकन्हय् अप्वः थें मनूतय् पीदँ पुलकि हे साहा साहा व क्वँय् स्याइगु समस्या जुयावयेधुंकी । थुकिया निंतिं नं अम्बः नियमित नयाच्वंसा फाइदा जुइ । अम्बलय् प्रशस्त क्याल्सियम दइ, गुकिं ओस्टोपोरोसिस व आर्थराइटिसयात फाइदा याइ ।

न्ह्यपुया ल्वचय्
अम्बलय् गुलखे अज्याःगु तत्व दु, गुकिं न्ह्यपुयात सिचुकातयेगु ज्या यानाच्वनी । अम्बःया सेवनं न्ह्यः क्वातुक वइ । दिमाग शान्त जुयाच्वनी । तनावपाखें मुक्त जुइ । अम्बःया सेवनं न्ह्याबलें वइगु उत्तेजनापाखें शान्ति दइ । धातुया ल्वय्, भुयू कुहां वइगु ल्वय्, बारम्बार कामुक बिचाः वयाच्वनीगु इत्यादिपाखें आराम दइ ।

इन्फेक्सन मजुइकेत
अम्बलय् ब्याक्टेरियालिसे ल्वायेगु गजबया क्षमता दयाच्वनी । थुकिया सेवनं झीत तःता हे ल्वय्पाखें रक्षा यानातइ । अम्बःया सेवनं म्हयात पुष्ट यानाबी, अले ल्वय्लिसे ल्वायेगु क्षमता अप्वयेकाबी । अले टक्सिन अर्थात विषाक्त पदार्थयात झीगु म्हं पितछ्वयाबी । अम्बलं अल्सर, अल्सरेटिभ, कोलेटीस, प्वाःया इन्फेक्सन थेंज्याःगु विकारयात खतम यानाबी । थुकिया निंतिं अम्बःचुं अथवा अम्बःया जूस छ्यःसा बांलाइ ।

मल्ह्वंकेत
अम्बलं म्हया मेटाबोलिज्मयात बल्लाकी । गुकिं यानाः ल्ह्वनावइगु जुइमखु । नयेगु रुचि नं अप्वइ । थुकिं छ्यंगू नं चमकदार जुयावइ ।

किडनीयात फाइदा
अम्बलं किड्नी (जलस्येँ)इ इन्फेक्सन जुइकेबीमखु । अम्बःया हः व सिमा ख्वलां मूत्रविकारय् फाइदा याइ । न्हासि वइबलय् नं अम्बः नयाबीबलय् फाइदा जुइ । अम्बःया रस अलःकै वयाच्वंपिंत नं वासः खः । थुकिया सिमाख्वलां पायरिया ल्वचय् फाइदा याइ ।

सँ बांलाकेत
अम्बः सँया निंतिं नं तसकं ज्या वः । थुकिं सँयात ख्वातुसे, हाकुसे व चमकदार दयेकाबी । थ्व कारणं हे अप्वः थें स्याम्पु व हेयर प्रोडक्टय् अम्बः छ्यलीगु खः । अम्बः नलकि अथवा थुकियात निनाः सँय् पातकि फाइदा जुइ । अम्बः सँयागु निंतिं छ्यलेगु ज्या सलंसः दँ न्ह्यवंनिसें जुया वयाच्वंगु दु । सँ हाइगु थुकिं ९० प्रतिशत तक कम यानाबी ।

म्हय् क्याल्सियम गाकेत
अम्बलं झीगु म्हयात माक्व क्याल्सियम बियाच्वनी । क्याल्सियम झीत झीगु म्हय् च्वंगु क्वँय्, वा, सँ व लुसियात मदयेक मगाः । थुकिया निंतिं भिटामिन सी गाक्क दुगु नसा नयेमाः । अले अम्बः थुकिया तःधंगु स्रोत खः । अम्बः नयेगु यातकि म्ह यक्व हे बांलानावइ ।

प्रोटीनया स्रोत
प्रोटीन दुगु नसा नयेगुलिं झीगु म्हयात सदां फिट यानातइ, स्वस्थ यानातइ । म्हय् मसलयात, सेप बढे यायेत यक्व मात्राय् प्रोटीन आवश्यक जुइ । अम्बलय् यक्व हे मात्राय् प्रोटीन दइ, गुकिं यानाः झीगु म्ह न्ह्याब्लें फिट जुयाच्वनी ।

डायबिटिज
अम्बलं ब्लड सुगरयात कन्ट्रोल याइ । डाक्टरं नं डायबिटिजया विरामीयात अम्बः नयेगु सल्हाः बी । अम्बःयात छिं सुखू यानाः, जूस दयेकाः, वा कचिकं हे न्ह्यागु रुपय् नःसां जिउ ।

प्वाःया समस्या
मेमेगु सिसाबुसा थें हे अम्बः नं फाइबर गाक्क दुगु सि खः । अम्बः नलकि ग्यास, कब्जियत, डायरिया आदि जुइमखु । उकिं जा नये धुंकाः अम्बःसुकू छकू नयेगु बानि यानादिसँ ।