च्वबहाः करुणामयया देगः जिर्णोद्वार क्वचाल

किपू – च्वबहाः करुणामयया देगः दने क्वचाल । आदिनाथ लोकेश्वरया नामं नं म्हसिका वयाच्वंगु थनया प्राचीन सम्पदा च्वबहाः करुणामयया देगः निगू करोड लागतय् पुरातत्व विभागं जिर्णोद्वार याःगु खः । उगु देगः २०७२ सालया भुखाचं क्षतिग्रस्त जूगु खः । देगःया पुजारी सरोज शाक्यं बियादीगु जानकारीकथं निदँया दुने देगः दने क्वचायेकेगु लक्ष्य तयातःगु खःसां प्राविधिक कारणं देगः दने क्वचायेकेगु ज्या छुं ई लिपा लाः वंगु खः ।

देगः क्षतिग्रस्त जुइवं पुरातत्व विभागं देगःया जिर्णोद्वारलिसें देगः दनेत माःगु खर्चया नं व्यवस्थापन याःगु खः । बौद्ध व हिन्दू निगुलिं समुदायं उतिकं आस्था तयाः माने यायेगु याना वयाच्वंगु च्वबहाः करुणामय लिच्छवीकालीन इलय् निर्माण जूगु विश्वास यानातःगु दु । गजूलिसें न्हय्तँजाःगु देगःया पौ प्यागोडा शैलीं निर्माण याःगु दु ।

पुजारी शाक्य कनादीकथं देगः दनेगु ज्या क्वचायेवं वंगु असोज २५ गतेकुन्हु च्वबहाः करुणामयया प्राणप्रतिष्ठा याःगु खः । थ्व स्वयां न्ह्यः च्वबहाः करुणामययात देगलय् बिज्याके न्ह्यव तान्त्रिक विधिपाखें क्षमता पुजा यानाः स्थानीय देवदेवीलिसे उजं कायेगु ज्या जूगु खः ।

देगः जिर्णोद्वारया निंतिं देगलय् च्वंम्ह च्वबहाः करुणामययात देगलं पित हयाः मेगु सुरक्षित थासय् बिज्याकूगु खः । दँय्दसं सीघःपुन्हि व चौलाथ्व अष्टमिकुन्हु च्वबहाः करुणामयया विशेष जात्रा जुइ । च्वबहाः करुणामयया दर्शन यात धाःसा पारिवारिक सुख, शान्ति कायम जुइगु नापं ल्वचं मुक्त जुइ धइगु जनविश्वास दु ।

सम्बन्धित बुखँ

LEAVE YOUR COMMENTS