वा स्याःगुया घरेलु उपचार

वा स्याइगु समस्या न्ह्यागु उमेरयाम्ह मनूयात नं जुइफु । वा स्यातकि ल्वगि वाथावाथा हे कनी । चान्हय् द्यने फइमखु । गुलिं गुलिं मनूतय् बिचाः दु कि न्हिं न्हिं मंजन वा टूथपेस्टं बुलेगु यानाच्वन धाःसा वा स्याइमखु, तर वा मेमेगु अनेक कारणं नं स्यायेफु । आपाःथें स्याइगु चाहिँ ब्याक्टेरिया, किलं नयाः जुइ ।

वा स्याइगु मेगु कारण वाया हा बमलाइगु अथवा अप्वः सेन्सेटिभ जुइगु नं खः । ब्याक्टेरिया अथवा की मदयेकेत एन्टिअक्सिडेन्ट आपाः दुगु चीज छ्यलेगु यायेमाः, अले वा बल्लाकेत नीहः छ्यलेगु यायेमाः । आः छक्वः थ्व निं सिइके कि वा धयागु छाय् स्याइगु खः ?

  •  गुलिं मस्त अले मिसा-मिजंतय्सं नं तसकं लापर्वाही यानाःटुथपेस्ट बुलेगु यायेयः । अथे जुइबलय् वाया दथुइ थानाच्वंगु अन्नया कण पिहां वयेफइमखु । बहनी द्यनेबलय् लाःया सम्पर्कं यानाः उगु अन्नया कण ध्वग्गिनावइ । उगु अन्नकण ध्वग्गित कि वाया हा फ्वाका जुइ । उगु फ्वाकागु थासय् नयागु चीज नं लाःवनी, अले ध्वग्गिनाः वा स्याना वइ ।
  • वा बांलाक सफा मयातकि गिजायात दकलय् अप्वः हानि याइ । गिजा मनावलकि गिजा कमजोर जुइ । गिजा कमजोर जुलकि वा त्वःत्वः धुली ।
  • गिजाय् जीवाणुतय्गु संक्रमण जुलकि पायरिया जुइ । पायरियां वायात यक्व हे नोक्सान याइ ।
  • बहनी वाय् मबुलकि वा अप्वः स्याइगु सम्भावना दइ ।
  • मस्त तिंतिंन्हुयाः म्हिता जुइबलय् इपिं भाराक्क दइगु सम्भावना नं दइ, अथे दइबलय् वा सनी अले स्यानावइ ।
  • प्वाथय् दुपिं मिसातय्त वा ध्वग्गीगु समस्या अप्वः जुइ, गुगु लिपा वनाः वा स्याइगु कारण जुइ ।
    ला स्याःगु लंकेगु घरेलु उपाय
  • लवं स्वफ्वः निनाः थुकियात कागतिया ५ ग्राम रसय् ल्वाकछ्यानाः वाय् इलादिसँ, अले फ्वाकागु थासय् नं तयादिसँ, वा मस्यानावनी ।
  • पाके जूगु भुइँकटहरया रसय् कपाय् थुनाः वाय् दिकाबिल धाःसां नं वा स्याःगु लनी ।
  • मलय्या ३ ग्राम पाउडर व सिंचिया ३ ग्राम पाउडर तूयागु ३ ग्राम चिकनय् ल्वाकछ्यानाः वाय् ५-७ मिनेट तक बुलाच्वन धाःसा वा स्याःगु लनी । गिजा मनावयाच्वंगु नं लनावनी ।
  • लाभा व लवंया पेस्ट दयेकाः वाय् पानाबिल धाःसां नं वा स्याःगु लनावनी ।
  • इमू निनाः वाय् पानाबिल धाःसां नं वा स्याःगु लनावनी ।
  • छगः कागतियात प्यकू कुचा थलाः उकी चि हाःहाः यानाः मिइ तयाः क्वाकादिसँ । गुगु वाय् स्यानाच्वंगु खः, उकिया क्वय् छकू छकू यायां प्यकुतिंयात पलख पलख वां त्यलातयादिसँ, वा स्याःगु लनावनी ।
  • फट्किरि व लवं उति उति हे मात्राय् निनाः वाय् इलादिसँ, वा स्याःगु लनावनी ।
  • हिं छकूचा क्वाकाः स्याःगु वां त्यलातयादिसँ, वा मस्यानावनी ।
  • कपूयात वाया दथुइ तल धाःसा भचा जायेकाः वा स्याःगु लनावनी ।
  • ३ ग्राम स्वंपालु न्हिछिया छक्वः लःलिसे भ्वाःतिनादिसँ । स्वन्हुप्यन्हु तक थथे यानाच्वन धाःसा वा स्याःगु व गिजा मनावःगु नितां लनावनी ।
  • अंजीरयात लखय् दायेकाः उगु लखं कुल्ला यात धाःसां गिजाया ल्वय् व वा स्याःगु लनावनी ।
  • जी सियाः ३ ग्राम मात्राय् पाउडर दयेकाः उकी ३ ग्राम सिंचि नचुक निनाः गिजाय् इलाबिल धाःसा मनावःगु व वा स्याःगु लनावनी ।
  • लवंचिकं कपाय्या ग्वाहालिं इलाबिल धाःसां नं वा स्याःगु लनावनी ।
  • वाय् की दाल धाःसा प्याज भचा क्वाकाः वाय् दिकादिसँ, अले तीजक तीजक त्यला च्वनादिसँ, प्याजया पालुगु रस ब्याक्टेरियां सह याये फइमखु अले वा त्वःतावनी । अले वाय् समस्या जुइमखु ।
  • जिफ्वःया चिकनय् कपाय् थुनाः वाया हाय् हाय् इलाबिल धाःसा वा स्याःगु लनावनी ।
  • आमाःसिमाया क्यातुगु हः न्ह्ययाच्वन धाःसां नं वा स्याःगु लनावनी । आमाःसिया हःयात लखय् दायेकाः उगु लखय् फटकिरि ल्वाकछ्यानाः कुल्ला यात धाःसां नं वा स्याःगु लनी ।
  • निगू चम्चा तूचिकं व बागू चम्चा चिचुं ल्वाकछ्यानाः म्हुतुइ तयादिसँ, अले उखेथुखे चाःहिइका च्वनादिसँ । म्हुतुइ अप्वः जायावल धाःसा भतिचा थुथु यानादिसँ । बाघौ तक म्हुतुइ तयातये धुंकाः दक्वं हे थुथु यानादिसँ । बाघौ तक लः त्वनादीमते । लखं म्हुतु च्वलादी नं मते । छुं दिनं हे पायरिया ल्वय् व वा स्याःगु लनावनी ।
  • तूचिकं व चि ल्वाकछ्यानाः गिजाय् बुलाबिल धाःसां नं वा बललाइ ।

सम्बन्धित बुखँ

LEAVE YOUR COMMENTS