पत्रकार दबू येँ जिल्लाय् अर्विन्द्रमान

येँ  – नेवाः पत्रकार राष्ट्रिय दबू येँ कचाया न्याक्वःगु दँमुँज्या व स्वक्वःगु अधिवेशनं अर्बिन्द्रमान सिंया नेतृत्वय् न्हूगु ज्यासना पुचः ल्यःगु दु। न्हूगु ज्यासना पुचलय् ल्यःपिं सकलें निर्विरोध निर्वाचित जुयादीगु खः ।

उगु न्हूगु ज्यासना पुचलय् प्रविण प्रजापति न्वकु, रत्न महर्जन ‘मन’ छ्याञ्जे, शरण डंगोल, विनिता शाही लिउछ्याञ्जे, राजेन्द्र मानन्धर ‘नीलः’ दांभरिंलय् ल्यःगु दुसा दुजलय् बिमला मानन्धर, शैलेस डंगोल, रेखा शाक्य, किचः सिंह, राजेन मानन्धर, रोजिता बुध्दाचार्य, सहयोग रंजित, बिजय सिं व मनोजरत्न शाहीपिं निर्वाचित जुयादीगु दु।

थ्व स्वयां न्ह्यः उद्घाटन सत्रय् मूपाहां येँ महानगरपालिया मेयर विद्यासुन्दर शाक्यं विशेष यानाः येँ च्वंपिं पत्रकारतय्सं महानगरपालिकाया गतिविधिया सत्यतथ्ययात उलाः समाचार च्वयेमाःगु खँय् बः बियादिल । वय्कलं गलतयात गलत धायेगु व सहीयात सही धायेगु धर्म पत्रकारतय्सं त्वःते मजिउ धासें थौंया अवस्थाय् नेवाः पत्रकारत सकलें व्यावसायिक जुइमफुगु खँ कुलादिसें व्यावसायिक व मिशन पत्रकारितायात नापनापं यंकेमाःगु अवस्थाय् दु धयादिल । पत्रकार दबूयात बी धकाः क्वःछिनातयागु ध्यबा इलय् काःमवःगुलिं द्यापं च्वनेमाःगु खँय् दुःख प्वंकादिसें वय्कलं दबूया छेँ दनेत जग्गा लुत धाःसा माःगु आर्थिक ग्वहालि यायेगु बचं नं बियादिल ।

ज्याझ्वलय् पाहांकथं झायादीम्ह प्रदेश ३या सांसद राजेश शाक्य व जीवन डंगोलं नं थःपिनिगु नुगःखँ प्वंकादीगु खःसा विशेष पाहां नेपाल कला प्रज्ञा प्रतिष्ठानया उपकुलपतिनापं वरिष्ठ फोटोग्राफर गोपाल चित्रकारं स्वनिगःया सम्पदा विश्वया हे सम्पदा जूगुलिं उकिया प्रचार प्रसार यायेगु व उकिया बारे विद्यालयस्तरय् पाठ्यक्रमय् ब्वंकेगु व्यवस्था स्थानीय सरकारं यायेमाः धयादिल ।

दबूया केन्द्रीय अध्यक्ष श्रीकृष्ण महर्जनं दबुलिं याना वयाच्वंगु थीथी ज्याझ्वःया जानकारी बियादिसें नेपालय् पत्रकारिताया संस्थागत विकासया खँय् नेवाः पत्रकारतय्गु विशेष भूमिका दुगु खँ कनादिल । उलेज्या लिपा जूगु बन्दसत्रय् येँ जिल्लाया छ्याञ्जे प्रजित शाक्यं प्रगति विवरण व दांभरिं राजेन्द्र मानन्धर ‘नीलः’ नं आर्थिक विवरण पेश यानादीगु खः ।

ज्याझ्वलय् दबूया येँ कचाया निगू कार्यकालतक नेतृत्व बियादीम्ह नातिकाजी महर्जनयात हनेगु नं याःगु खःसा वय्कलं उगु हे हे ज्याझ्वलय् नेवाः फोटो पत्रकारयात दँय्दसं पुरस्कार बीगु ल्याखं स्वनादीगु छगू लाख नीन्याद्वः तका दांया छगू अक्षय कोष नं स्वनादीगु खः ।

सम्बन्धित बुखँ

LEAVE YOUR COMMENTS