नेपालय् दिकल, भारतय् धाःसा परीक्षण कायम
येँ – भारतं वयाच्वंगु विषालु तरकारी परीक्षण नेपालय् दिकूसां भारतय् धाःसा नेपालं वनाच्वंगु हरेक कृषिउत्पादनया परीक्षण जुयाच्वंगु दु । भारतं नेपालं निर्यात जुइगु कृषि उत्पादनय् विषादी परीक्षण यानाच्वंगु हे खुदँ दयेधुंकल ।नेपालं भारतय् निकासी जुइगु कृषिजन्य वस्तु च्या, तग्वःगु यला, तुफि, हिमाली जटिबुटी, पालु आदि परीक्षण मयाकें दुत तकं काइमखु ।
छम्ह च्या उद्योगीया कथं भारतय् च्या निकासी यायेगु निंतिं कोलकत्ताय् यंकाः परीक्षण मयायेकं भारतय् दुत तकं यंकेफइमखु । मेखे नेपालय् धाःसा विषादीयुक्त तरकारी वयाच्वंगु खँ पिहां वयाच्वंसां सरकारं हे परीक्षणयात दिकूगु दु । भारतया हे दबाबय् सरकारं नेपालय् दुहां वइगु भारतीय तरकारीइ परीक्षण दिकूगु खँ नेपाःया किसान व व्यवसायीतय्सं धाःगु दु ।
नेपाः दुहां वइगु सीमा नाकाय् परीक्षण यायेगु बांलाःगु प्रयोगशाला मदु धासें कृषि मन्त्रालयं हे भारतीय तरकारीइ विषादी परीक्षण याकेमबिउगु खः । सरकारं भारतीय तरकारीइ परीक्षण दिकूगुलिं नेपाःया किसान, व्यवसायी व उपभोक्तातय्सं आक्रोस प्वंकूगु दु ।
व्यवसायीतय्सं नेपाली कृषि उत्पादनयात भारतं समान व्यवहार मयाःगु खँ धाःगु दु ।
इलामया गोर्खा टि इन्डष्ट्रिजया प्रोपाइटर उदय चापागाईं नं धयादीगु दु, ‘नेपालं भारतय् च्या निर्यात यायेबलय् कोलकत्ताय् यंकाः नमूना परीक्षण याकाः उकिया रिपोर्ट मवःतले च्या लोड यानातःगु गाडी तकं सीमा नाकाय् दिकातयेमाः । तर भारतय् नेपाली तरकारी धाःसा खुरुखुरु हे दुहां वइ ।
थुकिं भारतं नेपाःया उत्पादनयात गज्याःगु व्यवहार क्यनाच्वंगु दु धयागु छर्लङ्ग क्यँ ।’‘व्यवहार धयागु समान जुइमा’ धासें वय्कलं धयादीगु दु, ‘भारतं सामान वइबलय् धाःसा विषादी मापन व्यवस्था चिइकेमाःगु, नेपालं यंकेबलय् धाःसा जाँच मयायेकं दुत तकं काइमखु । थज्याःगु नं समान व्यवहार जुइला ?’
कृषि तथा पशुपंक्षी विकास मन्त्रालयया प्रवक्ता तेजबहादुर सुवेदीं बिबिसी लिसे खँ ल्हासें भारतय् कृषि उत्पादन निर्यात यायेत नेपाली व्यवसायीतय्सं कोलकता व लखनउ तक यंकाः परीक्षण याकेमाःगु व थुकिया निंतिं झिंन्यान्हु तक ई काइगु खँ धयादीगु दु ।
प्रवक्ता सुवेदीया कथं नेपालय् येँ, विर्तामोड, सर्लाही, पोखरा व बुटवलय् यानाः न्यागू प्रयोगशाला दु । सीमा नाकाय् प्रयोगशाला मदुसां नेपालय् भारतय् स्वयां अप्वः प्रयोगशाला दु, अथे खःसां भारतीय व्यवसायीतय्सं सीमा नाकाय् मदुगुलिं झन्झट जुल धायेवं मन्त्रालयं हे परीक्षण हे दिकाबिउगु द्वपं नेपाली व्यवसायीतय्सं बिउगु दु ।
LEAVE YOUR COMMENTS