ने. सं. ११४४ कौलाथ्व पारू - नःलास्वनेगु

ख्वपय् सम्पदाय् निहित ज्ञान परम्परा बारे अन्तक्र्रिया

ख्वप – थनया मौलिक सम्पदाय् निहित ज्ञान परम्परा विषयय् छगू अन्तक्र्रिया ज्याझ्वः जुल । सहृदयता समाज नेपाल व सहृदयता उद्यमशीलता प्रा. लि.या मंकाः ग्वसालय् वंगु शनिवाः उगुु अन्तक्र्रिया ज्याझ्वः जूगु खः ।सहृदयता समाजया थःगु हे ज्याकुथिइ जूगु अन्तक्र्रिया ज्याझ्वलय् मूपाहां कथं जरोकिलो अभियानया अभियन्ता डा. निर्मलमणि अधिकारी झाःगु खः ।

वय्कलं ज्याझ्वलय् मूर्त व अमूर्त सम्पदायात समुचित ढंगं संरक्षण यानाः पुलांगु परम्परागत ज्ञानपाखें हे आधुनिक समाजयात नेतृत्व याना वनेमाःगु तर्क तयादिल । ख्वप देय् उकिया लागिं छगू सबल, सक्षम व योग्य थाय् जूगु खँ न्ह्यथनादिसें वय्कलं कुम्हाःया घःचा थें झीगु जीवन चाःचाःहिला हे च्वनी धयादिल ।

समाजया अध्यक्ष बलराम प्रजापतिया सभापतित्वय् कृष्णराम प्रजापतिं न्ह्याकादीगु ज्याझ्वलय् स्वतन्त्र पत्रकार समाज ख्वपया अध्यक्ष व सहृदयता समाजया सल्लाहकार डा. इन्दुल केसीं मःमः व समोसाया कारणं झीगु मन झन् झन् थःगु मौलिकतां तनावंगु जक मखसे लोप जुइगु अवस्थापाखे हे थ्यनाच्वंगु खँ कनादिल ।

जरोकिलो अभियानया न्वकू डा. गोविन्दशरण उपाध्यायं ख्वप थेंज्याःगु परम्परागत ज्ञानया भण्डार मेगु लुइके थाकुइगु खँ कनादिल । ज्याझ्वलय् सहभागीतय् दथुइ मौलिक सम्पदा व उकी निहित जुयाच्वंगु परम्परागत विषययात कयाः थवंथवय् अन्तक्र्रिया नं जूगु खः ।