ने. सं. ११४४ ञलागा पारू -

दीपिकायात सफलता

बलिउडया बहुचर्चित संकिपा ‘पद्मावती’ प्रदर्शनय् वःगु बाःछिया दुने हे भारु २३६ करोडं मल्याक व्यापार यानाः सफलताया श्रृंखलाय् छगू न्हूगु आयात तना बिउगु दु । पद्मावतीया थुकथंया सफलतां थ्व स्वयां न्ह्यः बलिउडय् गुलि नं संकिपां व्यवसायिक संकिपाया कीर्तिमान कायम यानातःगु खः, व दक्वंयात लिउने लाका बिउगु दु ।
थुगु संकिपां याःगु थुकथंया व्यापारं थुकिया निर्माता, निर्देशकलिसें समग्र कलाकार व प्राविधिकयात लसता हया बिउगु ला जु हे जुल । उकिसनं दकलय् अप्वः चर्चा व सफलताया प्राप्त यायेत सफल जूगु दु, संकिपाया नायिका दीपिका पादुकोणं ।

छाय्कि दीपिकां थ्व स्वयां न्ह्यः म्हितूगु गुलि नं संकिपा दु, व दक्वं संकिपायात लिउने लाका बिउगु दु पद्मावतीया व्यावसायिक सफलतां । थुकिया लिसें दीपिकां फिल्मया सफलतालिसें व्यावसायिकताया ल्याखं थः समकक्षीयात नं लिउने लाकेत सफल जूगु चर्चा बलिउडय् थ्व इलय् जुयाच्वंगु दु । दीपिकां हे म्हितूगु चेन्नई एक्सप्रेसं भारतीय बजारय् मुक्कं २२६ करोडया व्यापार याःगु खः । जबकि पद्मावतीं बाःछिया दुने हे व रकेर्डयात त्वाःथला बिउगु दु । प्रदर्शनय् वःगु बाःछिया दुने हे थुकथं दकलय् अप्वः ध्यबा कमे यायेत सफल पद्मावती १० गू हिन्दी संकिपा दुने लायेत नं सफल जूगु दु । जबकि भारतया मेगु प्यंगू राज्य गुजरात, राजस्थान, मध्यप्रदेश व हरियाणाय् थ्व संकिपा प्रदर्शन याये फयाच्वंगु मदुनि ।