धरहराय् लँ चायेकेत खास समस्या छु ?, लँया माग यासें तोडफोड
येँ–२२ नम्बर वडाया स्थानीय जनताया माग कथं उगु थासय् परम्परागत लँ चायेका बीत पुनर्निर्माण प्राधिकरण तयार हे दुसां अन उत्पन्न जूगु छगू प्राविधिक समस्यां यानाः लँ दयेकेत थाकुयाच्वंगु खँ प्राधिकरण सूत्रं धाःगु दु ।
स्थानीय जनतां धयाच्वंगु उगु परम्परागत लँ चायेकेगु लागिं सञ्चय कोषं दयेकातःगु काठमाडौं मलया लिउनेया छगू ब्व नं तछ्यायेमाःगु आवश्यकता दु । उगु ब्वय् काठमाडौं मलया स्वाहाने लानाच्वंगु दु । काठमाडौं मलया उगु ब्वयात लँ दयेके धुनेवं मलयात लिक्कसं च्वंगु हुलाक विभागया छकू जग्गा सट्टाभर्ना बीगु खँ जूगु खः । धरहरा दयेकेगु लागिं हुलाक विभागयात अनं थना छ्वइगु जुइधुंकूगु दु । हुलाक विभागयात आः बबरमहलय् शाही औषधी लिक्कसं च्वंगु जग्गाय् छेँ दनाः तयेगु खँ जुयाच्वंगु दु । तर अन हुलाक विभागया लागिं छेँ दनेगु ज्या धाःसा जूगु मदुनि । उकिं हुलाक दना वनीगु अवस्था मदु । थौंकन्हय् उगु हुलाक विभाग दुने करिब ३ अर्ब तकाया हुलाक टिकट स्टक लानाच्वंगु दु । उकिं उकिया सुरक्षाया लागिं नं विभाग हथासं मेथाय् च्वं वने मछिं । हुलाक अनं चिला मवंतले काठमाडौं मलया स्वाहाने थुने मछिंगु व उगु स्वाहाने मथुंतले अनं लँ पिकाये मछिंगु अवस्था जुयाच्वंगु खँ सूत्रं धाःगु दु ।
प्राधिकरणं हुलाक विभागया समस्या समाधान जुइवं लँ पिकायेगु ज्या जुइ धकाः स्थानीय जनतायात धयाच्वनागु खँ नं धाःगु दु ।
लँया माग यासें धरहराय् तोडफोड
थौंकन्हय् न्हूगु निर्माण यानाच्वंगु धरहराया नापसं च्वंगु परम्परागत लँ चायेकेगु ज्याय् ढिलासुस्ती यानाच्वंगु खनाः तम्वःपिं वडा २२ या स्थानीय जनतां शुक्रवाः अन लँ बन्द यायेत धंका तःगु जस्ता–पाता क्वःथला बिउगु दु ।
खिचापुखुलिं तप्यंक तिंख्यः पिचायेकः वने जिउगु उगु लँ टक्सार विभाग जुयाः वनेगु खः । न्हूगु धरहरा दयेकेगु खँ वःबलय् हे स्थानीय जनतां उगु लँ चायेका बीमाः धकाः कबुल याकूगु खः । तर लँ चायेकेगु बारे पुन–र्निर्माण प्राधिकरणं छुं पहल मयाःगु कारणं म्हिगः उगु लागाय् सक्रिय जुयाच्वंगु खुगू क्लबया पहलय् लँ पनेत धंका तःगु जस्तापाता लिकया बिउगु खः । उकी २२ वडाया अध्यक्ष चिनीकाजी महर्जन नं सहभागी जुयादीगु खः।
म्हिगःया उगु घटना लिपा प्राधि–करणं उकिया विकल्पय् मेगु लँ बी मफुतले वहे लँ चले याके बीगु आश्वा–सन बिउगु दु ।
वडा अध्यक्ष महर्जनं म्हीग स्थानीय जनतां केवल लँया जक खँ ल्ह्वंगु धासें धरहरा दनेगु ज्याय् छुं पंगः मथंगु जानकारी बियादिल । यदि लँ खुले यायेगु ज्याय् अप्वः ढिलासुस्ती जुल धाःसा थनया जनता सुम्क च्वनी मखु धकाः संकेत बीत जक प्रदर्शन यानागु खँ नं वय्कलं कनादिल । अन क्रियाशील खुगू क्लबं अन ब्यानर हे यखायाः सम्पदा मार्ग खुल्ला व लुँहिति संरक्षणया माग याःगु दु ।
LEAVE YOUR COMMENTS