यल मनपाया पर्यटकया निंतिं विद्युतीय बस

यल – यल महानगरपालिकां पर्यटकतय् सुविधाया निंतिं विद्युतीय बस संचालनय् हइगु जूगु दु । यल मनपां पर्यटकयात सुविधा बीगु उद्देश्यं विद्युतीय बस सेवा संचालनय् हयेत्यंगु खः ।यल मनपां पर्यटकीय बसया निंतिं थुगु दँया बजेटय् न्यागू करोड तका दां विनियोजन ायःगु खः ।

यल मनपाया दुनेया लागाय् सार्वजनिक सवारी साधन दुहां मवनीगु, ट्याक्सीं नं थिकेक भाडा काइगु जूगुलिं पर्यतकयात सुविधा बीगु ल्याखं विद्युतीय बस संचालन यायेत्यनागु यल मनपाया प्रवक्ता राजु महर्जनं कनादिल । यल महानगरं दुनेया लागाय् च्वंगु पर्यटकीय गन्तव्ययात लक्षित यानाः उकथं बस संचालन यायेगु योजना हःगु खःसां नं छु गुगु रुटय् बस संचालन यायेगु व ग्वःगः बसया आवश्यक जुइ धइगु खँय् अध्ययन जुयाच्वंगु महानगरं न्ह्यथंगु दु ।

पर्यटकत ट्याक्सीइ वनेत स्वःसां नं म्हो दूरीइ वनेत माने मजुइगु जक मखु वं हे वन धाःसां नं धाक्व ध्यबा कायेगु यानाच्वंगु दु । थुकिं यानाः पर्यटकत दुने लागाय् चाःहिलेत समस्या जुयाच्वंगु दु । यल लाय्कू लागालिसें मेमेगु थाय्, देगः व विहार लगायतया क्षेत्रयात कःघानाः रुट दयेकाः बस सेवा संचालन यायेगु प्रवक्ता महर्जनं धयादिल ।