लगानी सम्मेलन न्ह्यः धमाधम न्हूगु कानुन

येँ – सरकारं घोषणा यानातःगु लगानी सम्मेलन न्ह्यःने वयेवं आर्थिक सुधार सम्बन्धी बागू दर्जनति न्हूगु कानून दयेकेत्यंगु दु । संघीय संसदय् न्ह्यब्वःगु थ्व कानुनी नीतिगत सुधारय् तःधंगु हिउपाः हइगु खँ विज्ञतय्सं धाःगु दु । थ्यंमथ्यं स्वीदँ लिपा थज्याःगु न्हूगु कानुन वयेत्यगु खँय् व्यवसायीपिंसं लसता प्वंकूगु दु ।

कानुनय् सुधार हयेगु झ्वलय् सोमवाः जक वैदेशिक लगानी तथा प्रविधि हस्तान्तरण सम्बन्धी विधेयक प्रतिनिधि सभां पारित याःगु दु । थ्वयां छुं न्हि न्ह्यव जक संसदं विशेष आर्थिक क्षेत्र सम्बन्धी संशोधन सहितया विधेयक तथा सार्वजनिक निजी साझेदारी तथा लगानी सम्बन्धी विधेयक पारित याःगु खः ।

अथेहे औद्योगिक व्यवसाय विकास प्रतिष्पठान ऐन २०५३ यात संशोधन यायेत दयेकेगु विधेयक व्यापारि नियमनया निंतिं आवश्यक सेफगार्डस, एन्टी डम्पिङ्ग तथा काउन्टरभेलिङ्ग सम्बन्धय् व्यवस्था यायेत दयेकूगु विधेयकया लिसें दकलय् न्हूगु राष्ट्रिय प्राथमिकता दुगु आयोजनाया दू्रत निर्माण व विकासया निंतिं व्यवस्था यायेत विधेयक नं संसदय् दर्ता जुइधुंकूगु दु ।

अर्थविदतय् कथं थ्यंमथ्यं २७ दँ न्ह्यव नेपालय् प्रजातन्त्र पुनस्र्थापना लिपा छगू चरण आर्थिक उदारिकरण व सुधारया निंतिं न्हूगु कानून हःगु खः । थ्व लिपा आःया जक थुलिमछि विधेयक हयाः आर्थिक कानुनय् सुधार हयेत स्वःगु खः । बिबिसीलिसे खँ ल्हासें अर्थविद् डा. शंकर शर्मां वैदेशिक लगानी हयेत कानुनय् थुलि जक सुधार यानाः मगाःगु खँ धयादी, ‘म्होतिं नं दक्षिण एशिया, उकिसनं भारतय् स्वयां सुधार जूगु कानुन हयेफुसा जक वैदेशिक लगानी नेपालय् दुकायेफइ ।’

वय्कःया कथं आः हःगु न्हूगु विधेयकया प्रावधान सर्सती स्वयेबलय् अझ नं भारतया कानुन स्वयां सुधार जूगु खनेमदुनि । ‘अथें नं पूर्वाधारय् झी भारत स्वयां लिउने दु । पूर्वाधार धयागु तुरुन्त दयेके फइ नं मखु । उकिं ऐन कानुन व उकिया कार्यान्वयनय् झी भारत स्वयां छपलाः न्ह्यःने लाःसा हे जक लगानी दुत हयेफइ’ वय्कलं धयादीगु दु ।

मेम्ह अर्थविद् केशव आचार्यं आः हःगु न्हूगु कानुन पुस माघय् हे पारित जूगु जूसा बांलाइगु खँ धयादी । ‘लगानी सम्मेलन न्ह्यःने वयेधुंकल, आः नकतिनि जक कानुन हःबलय् लगानी सम्मेलनय् वइपिं उगु कानुन बारे बांलाक अध्ययन हे याःगु दइमखु’ बिबिसीलिसे खँ ल्हासें वय्कलं धयादिल, ‘छुं ई न्ह्यव हे कानुन वःगु जूसां सम्भावित लगानीकर्तात उगु कानुनया विश्लेषण सहित वइगु जुइ ।

न्ह्यागुसां आः सरकारं ऐन कानुन हयेत प्रतिबद्धता प्वंकूगु दु, थ्व नं बांलाःगु हे खँ खः ।’निजी ख्यलं आः कानुनय् हःगु सुधारया कुतःयात लसकुस याःगु दु । निजी ख्यःपाखें आः हःगु कानुनं जक सुधारया ज्या पूवनीमखु धाःसां आः जुयाच्वंगुु कुतःयात धाःसा लसकुस हे याःगु दु ।

नेपाल उद्योग वाणिज्य परिसंघया अध्यक्ष हरिभक्त शर्मां बिबिसीयात धयादीगु दु, ‘सांसदतय्त जिमिगु इनाप छु दु धाःसा फुसा दक्षिण एशियाया मेमेगु देशय् स्वयां बांलाःगु कानुन दयेके, मखुसा म्होतिं नं उमिगु स्वयां खराब मदयेके ।’सरकारं थ्वहे चैत १५ व १६ गते लगानी सम्मेलन यायेत्यंगु दु ।

सम्मेलन न्ह्यव हे कानुनी सुधार हयाः संसदं पारित यानाः लगानीकर्तातय् दथुइ सुधारया संकेत बिइगु सरकारया कुतः खः । तर सत्ता पक्ष व विपक्षया सांसदतय्सं थज्याःगु महत्वपूर्ण कानुन हथासं हःबलय् गाक्क सहलह तकं यायेमखंगु गुनासो प्वंकाच्वंगु दु

देशय् वैदेशिक लगानी दुत हयेगु निंतिं कानुन महत्वपूर्ण जूसां नेपालय् थुकिया कार्यान्वयन धाःसा तसकं जटिल जुयाच्वंगु दु । धाथें लगानी दुत हयेगु खःसा कानुन जक दयेकां माःगु थुकिया कार्यान्वयनय् दइगु प्रशासनिक झमेला व भ्रष्टाचार थेंज्याःगु पंगः चिइकेफुसा जक धाथें वैदेशिक लगानी दुत हयेफइगु खँ नं विज्ञतय्सं धाःगु दु ।

सम्बन्धित बुखँ

LEAVE YOUR COMMENTS