युद्ध तापाकेगु पाकिस्तानी सूत्र

छिटफुट शुरु जुइधुंकूगु भारत–पाकिस्तान युद्धय् पाकिस्तानी प्रधानमन्त्री इमरान खानं म्हितूगु भूमिकायात विश्वं तारिफ याना हःगु दु । पाकिस्तानी भूमिइ आक्रमण याः वःम्ह भारतीय सैनिक विमानया छम्ह पाइलटयात ज्वनेधुंकाः नं म्हिगः सकुशल भारतयात लःल्हाना बीवं पाकिस्तानी प्रधानमन्त्री खानया परिपक्व निर्णययात विश्वं तारिफ याना हःगु खः । थुकिं प्रम खानं भारतलिसे जुइत्यंगु युद्धया सम्भावनायात तापाका छ्वःगु जक मखु विश्व शान्तिया लागिं पाकिस्तान गुलि इच्छुक धइगु दसु नं न्ह्यब्वयादीगु दु । खानया थ्व पलाखं भारतीय प्रधानमन्त्री नरेन्द्र मोदीयात मछिंगु अवस्थाय् लाका बिउगु दुसा भारतया युद्ध–चाहनायात नं उला बिउगु दु ।

वंगु वालय् भारतया काश्मिरस्थित सैनिक अखडाय् जूगु आतंकवादी आक्रमणय् लानाः ४६ म्ह भारतीय सैनिक निधन जुइवं भारतं थ्व ज्या पाकिस्तानयागु खः धइगु द्वपं बिसें जैस–ए–मोहम्मद नांगु आतंकवादी संगठनयात ध्वस्त यायेगु नामय् पाकिस्तानी भूमिइ आक्रमण याः वंगु खः । थःगु देशय् बम मुइकूपिं आतंकवादी मालेगु नामय् कर्पिनि देशय् आक्रमण याः वनेगु भारतया पलाः अवश्य नं निन्दनीय खः । भारतया थ्व आक्रमण लिपा पाकिस्तानं नं भारतीय भूमिइ आक्रमण याः वनी धकाः अनुमान जुयाच्वंगु खः । तर पाकिस्तानं अथे मयासे थम्हं ज्वनेधुंकूम्ह भारतीय पाइलटयात समेत ससम्मान त्वःता बिउगुलिं जुइत्यंगु युद्ध जक स्थगित जूवंगु मखुसें यदि विश्वय् युद्ध मजुइकेगु खःसा धाथें यायेमाःगु छु खः धइगु सन्देश नं बिउगु दु । पाकिस्तानी प्रम खानया थ्व पलाःयात लसकुस याये हे माः ।

सम्बन्धित बुखँ

LEAVE YOUR COMMENTS