ट्यांकीइ ठेकेदार सिनाच्वंगु लुल

यल – थनया ढोलाहितिइ मेलम्ची खानेपानीया ट्यांकीइ ठेकेदार सिनाच्वंगु अवस्थाय् लूगु दु । भारतया बतिया छेँ जुयाः यलय् च्वनाच्वंम्ह ४९ दँया ईश्वर महतो सिनाच्वंगु अवस्थाय् लूगु खः ।यलया प्रहरी परिसरया कथं महतो लः मदुगु न्हूगु रिजर्भ ट्यांकी दुने सिनाच्वंगु अवस्थाय् लूगु खः । मंगलवाः सुथय् प्रहरीयात घटनाया बारे जानकारी वयेवं अनुसन्धान ज्या न्ह्याकूगु खँ प्रहरी धाःगु दु ।

अनुसन्धान अधिकारीतय्सं घटनास्थलया मुचुल्का उठे यायेधुंकूगु दु । न्हू दयेकूगु ट्यांकीइ महतोया सीम्ह लुइवं घटना थप रहस्यमय जूगु खँ प्रहरीं धाःगु दु । घटना भवितव्य खः वा नियोजित धइगु बारे थप अनुसन्धान जुयाच्वंगु व पोष्ट मार्टमया रिपोर्ट वयेधुंकाः जक थप खँ सी दइगु खँ प्रहरीं धाःगु दु । ट्याकी २० फिट तजाःगु खँ धाःगु दु ।