न्हूदँया लसताय् धादिङ्गय् विशेष ज्याझ्वः

धादिङ्ग – नेपाल संवत् ११३९ न्हूदँया लसताय् धादिङ्ग जिल्लाया गल्छि गाउँपालिकाय् न्हापांखुसी न्हूदँया ¥याली पिदंगु दु । नेवाः देय् दबू, गल्छि गाउँपालिका धादिङ्गया ग्वसालय् कछलाथ्व पारु न्हूदँ कुन्हु पिदंगु ¥यालीया उलेज्या गल्छि गाउँपालिकाया नायः कृष्णहरि श्रेष्ठं यानादीगु खः ।

¥याली समापन ज्याझ्वलय् येँ–धादिङ्ग न्हूदँ भिंतुना ¥यालीया कजि तुलसीहरि प्रजापति विशेष पाहांकथं झायादीगु खःसा पाहांकथं गल्छि गाउँपालिका वडा नं. ६ या अध्यक्ष राजन श्रेष्ठ, गल्छि गाउँपालिकाया नेकपाया प्रतिनिधि व नेपाली कांग्रेसया प्रतिनिधिलिसें थीथी खलःपुचःया प्रतिनिधिपिं झायादीगु खः ।

विशेष पाहांकथं झायादीम्ह प्रजापतिं नेपाल संवत् व थुकिया महत्व कनादिसें नेपाल संवत् धइगु मात्र नेवाःतय्गु जक मखसे सकल नेपाःमिपिनिगु थःगु हे मौलिक संवत् जूगु व थ्व वैज्ञानिक नं जूगु खँ तयादीगु खः । ज्याझ्वःया मूपाहां श्रेष्ठं नेपाल संवत् ११३९ न्हूदँया भिंतुुना बियादिसें जिल्लाय् हे न्हापांखुसी जूगु न्हूदँया भिंतुना ¥यालीइ ब्वति काये खनाः थः तसकं लय्ताःगु खँ कनादिल ।

लिसें वय्कलं वइगु दँय् अझ झःझः धायेक न्हूदँ हनेगु बचं बियादिसें झीगु कला व संस्कृति झीगु म्हसीका जूगुलिं थुकियात ल्यंका तयेमाः धयादिल । नापं वय्कलं थुकिया निंतिं गल्छि गाउँपालिकापाखें माःगु ग्वहालि यायेगु बचं नं बियादिल ।पाहांकथं झायादीपिं थीथी पार्टीया प्रतिनिधिपिंसं भिंतुना बियादिसें न्हापांखुसी जूगु ¥याली तसकं च्वछायेबह जूगु व थुकियात निरन्तरता बिया वनेमाःगु खँय् बः बियादिल ।

ज्याझ्वःया सभापति हिराकाजी श्रेष्ठं ¥यालीइ ब्वति कयादीपिं सकसितं सुभाय् देछासें वइगु दिनय् भाय्, कला व संस्कृति थेंजाःगु ज्याझ्वः अझ धिसिलाक न्ह्याका यंकेगु व थुकी सकसिगुं ग्वहालि दइ धइगु आशायासें सभा क्वचायेकादीगु खः ।