नेपालभाषा साहित्य तःमुँज्याया भिंतुना र्याली व सभा
ख्वप- नेपालभाषा साहित्य तःमुँज्याया ग्वसालय् नकतिनि क्वचाःगु स्वीच्याक्वःगु नेपालभाषा साहित्य तःमुँज्या जूगु थाय् कमलविनायक व गाःहिति निगू थासं नेपाल संवत् ११३९ न्हूदँया लसताय् भिंतुना सांस्कृतिक र्याली पिदन । र्याली ख्वप देय् चाःहिलाः लाय्कुलिइ थ्यंकाः सभाय् हिउगु खः ।
ज्याझ्वलय् नेमकिपाया केन्द्रीय सचिव नापं सांसद प्रेम सुवालं नेपालभाषा साहित्य तःमुँज्या दक्वं भाषाभाषिया मंकाः दबू जूगु न्ह्यथंसें आः ख्वपयात शिक्षा व संस्कृतिया केन्द्र दयेकाः सांस्कृतिक नगर घोषणा यायेगु पहल जुयाच्वंगु जानकारी बियादिल ।
प्रदेश नं. ३या सांसद सुरेन्द्रराज गोसाईनं कार्लमाक्र्सया निसःदँ बुदिंकथं तःमुँज्यां न्हूदँया र्याली पिथना च्वनागु खः धयादिसें थौंकन्हय् नक्कली कम्युनिष्ट पार्टीं सत्ता चले यानाच्वंगु द्वपं बियादिल । वय्कलं सत्तासिन दल नक्कली कम्युनिष्ट पार्टी जूगु व आः इमित नांगा यायेगु हे थ्व न्हूदँया सन्देश जुइमाः धयादिल ।
तःमुँज्याया छ्यांजे नं जुयादीम्ह गोसाईनं सरकारं जात जाति दथुइ ल्वापु थलेगु ल्याखं मिपुसा पियाच्वंगु द्वपं बियादिसें हत्या हिंसा विरुद्ध संघर्ष न्ह्याकेमाःगु खँ कुलादिल । प्रदेशसभाया मेम्ह सांसद सिर्जना सैंजूं जनता म्वाःसा भाषा म्वाइगु खँ स्पष्ट यानादिल ।
तःमुँज्याया नायः चन्द्रबहादुर उलकया सभापतित्वय् जूगु सभाय् ख्वप नगरपालिकाया उपमेयर रजनी जोशीं ख्वप नगरपालिकां नेपालभाषा, नेपाल संवत् व नेवाः जातिया उत्थान व प्रगतिया लागिं यानाच्वंगु थीथी तालिम व गतिविधि कनादिल ।
सभा स्वयां न्ह्यः ¥यालीइ सहभागी संघसंस्थाया नायः–प्रतिनिधिपाखें खौमाय् च्वंगु मास्टर जगतसुन्दर मल्लया झ्वाताय् स्वां देछायेगु ज्या नं जूगु खः । सांस्कृतिक र्यालीइ सछि स्वयां अप्वः बाजंखलःया सहभागिता दुगु खः ।
LEAVE YOUR COMMENTS