काठमाडौं नेवाः किन्डरगार्टेन व काठमाडौं मोडेल स्कुलय् म्हपुजा
येँ – काठमाडौं नेवाः किन्डरगार्टेन व काठमाडौं मोडेल स्कुलया नच्चापिं ब्वँमिपिंत म्हपुजा याःगु दु ।काठमाडौं मोडेल स्कुलय् युकेजी तगिमय् ब्वनाच्वंपिं नीछम्ह मस्तय्त म्हपुजा याःगु खः । युकेजी तगिमय् अध्ययन यानाच्वंपिं नेवाः लगायत ब्रम्हु, तामांग, राई, गुरुङ, मगः, ठकुरी, लगायतया मस्तय्त नं नेवाः परम्पराकथं मन्दः पुज्यानाः, ख्यें सगं बियाः म्हपुजा याकूगु खः ।
म्हपुजा यायेगुया नापनापं उकिया विधि व म्हपुजाया महत्वया बारे नं जानकारी बिउगु खः । स्कुलया हे स्यनामिपिंसं छसिकथं म्हपुजाया थीथी विधि न्ह्याकूगु खः ।अथे हे काठमाडौं नेवाः किन्डरगार्टेनय् नं युकेजी तगिमय् ब्वनाच्वंपिं नीन्याम्ह मस्तय्त म्हपुजा याःगु खः ।
थन जूगु म्हपुजा ज्याझ्वलय् नेवाः सांस्कृतिक आन्दोलनय् अतिकं सक्रियम्ह नानीहेरा महर्जन मूपाहांकथं झायादीगु खः ।वय्कलं हे सकलें मस्तय्त म्हपुजा यानादीगु खः ।थुकथं हे किन्डरगार्टेनय् अध्ययन यानाच्वंपिं युकेजी तगिंया हे मस्तय् अभिभावकपिनि दथुइ मन्दः च्वज्या कासा नं जूगु खः ।
उगु कासाय् युकेजी तगिमय् ब्वनाच्वंम्ह एरोसा महर्जनया अभिभावकं दकलय् बांलाक मन्दः च्वयादीगु खःसा वय्कःयात पाहांकथं झायादीम्ह नांजाःम्ह म्येँ हालामि पवित्र कसाःनं लुमन्तिं लःल्हानादीगु खःसा पाहांकथं झायादीपिं महर्जन व कसाःयात स्कुलया निर्देशक राजेन्द्र महर्जनं लुमन्तिं चिं लःल्हानादीगु खः ।
थुगु स्कुलं वंगु च्यादँ न्ह्यवंनिसें युकेजी तगिंया मस्तय्त म्हपुजा यायेगु नापं उकिया महत्वया बारे जानकारी बीगुयालिसें थीथी नेवाः नखःचखःया लसताय् ज्याझ्वःत यानाः मस्त व इमि अभिभावकयात नं थुकिया जानकरी बीगु याना वयाच्वंगु दु ।
LEAVE YOUR COMMENTS