भावी प्रधानमन्त्रीया लागिं भारतीय प्रमया विशेष सन्देश

येँ- नं नेपाःया नेतात जक भारतय् ब्वाँय् जुइगु खनाच्वंपिं नेपाली जनतायात अजूचायेकापुक थुगुसी भारतीय नेतात हे नेपालय् ब्वाँय् वयाच्वंगु दु । नेपाःया राजनीतिइ गनं छुं चर्चा तक हे मयासे भारतीय विदेशमन्त्री सुष्मा स्वराज नेपाः वयेत्यंगु खँ न्यनाः राजनीतिक वृत्त चकित जूगु दु ।

मेगु वाःया विहीवाः व शुक्रवाः निन्हुया लागिं विदेशमन्त्री स्वराज नेपाः भ्रमणय् वयेत्यंगु खः । स्वराजया थ्व नेपाः भ्रमणया खास एजेण्डा छु खः धइगु खँ सी मदुनि । अथे खःसां वय्कः भारतीय प्रधानमन्त्री नरेन्द्र मोदीया विशेष सन्देश ज्वनाः नेपाः वयेत्यंगु खँ धाःगु दु । स्वराजया थ्व नेपाः भ्रमणया न्हापांगु जानकारी नेपाःस्थित भारतीय राजदूतावासं बिउगु खः । उकिं नेपाःया मेगु छुं निकायतय्सं थुकिया बारे ‘डिटेल’ मसिउनिगु खँ धाःगु दु ।

नेपालय् आः याकनं हे न्हूगु सरकार गठनया तयारी जुयाच्वंगु सन्दर्भय् भारतीय विदेशमन्त्रीया थ्व नेपाः भ्रमण जुइत्यंगु खँ धाःगु दु । वय्कलं थन वयाः भावी प्रधानमन्त्री कथं चर्चाय् वयादीम्ह एमाले अध्यक्ष केपी ओलीयात नापलानाः मोदीया सन्देश बियादीगु खँ धाःगु दु ।

भारतीय प्रम मोदीं नं ओलीयात निक्वः तक फोन यानाः बधाई बियादी धुंकूगु दु । ओली आः न्हूम्ह प्रधानमन्त्री जुइगु जुल धकाः आः तक स्वयम् एमालें हे औपचारिक निर्णय मयाःनिगु इलय् भारतीय प्रधानमन्त्रीं ‘भावी प्रधानमन्त्री कथं बधाई’ बियाहःगु खँयात नं थन अर्थपूर्ण रुपं थुइका हःगु दु । मोदीं प्रम शेरबहादुर देउवा व पुष्पकमल दाहालयात नं फोन यायेधुंकूगु दु ।

कुटनीतिक च्यानल छाय् प्रयोग मयाःगु ?

नेपाः वइगु धकाः चर्चा जूम्ह भारतीय विदेशमन्त्री सुष्मा स्वराजया थ्व भ्रमणया न्हापांगु जानकारी नेपाःया परराष्ट्र मन्त्रालयं मबिसे नेपाःस्थित भारतीय राजदूतावासं बिउगु खः । नेपाःया छुं कुटनीतिक नियोगयात छुं जानकारी तकं मबिसे तप्यंक औपचारिक भ्रमणय् वयेगु भारतया थ्व पलाःयात नं थन मेगु ‘हेपाहा’ प्रवृत्तिया रुपय् थुइका हःगु दु । थ्व वय्कःया निजी भ्रमण मखुसें राजनीतिक भ्रमण जूगु कारणं उकिया तय यायेगु ज्या समेत राजनीतिक तवरं जुइमाःगु खँ थन धयाहःगु दु ।