ने. सं. ११४४ कछलागा सप्तमी -

बुद्धि दुपिं क्वः

धम्पय् तयातःगु लः त्वनेगु निंतिं क्वखं धम्पय् चागः कुर्काः थःम्हं न्ह्याये दयेक थत हयाः लः त्वंगु बाखं ला यक्वस्यां न्यनातःगु दइ । तर धाथें थपाय्सकं चलाखपिं क्वः नं दु धयागु खँ यक्वसिनं मसिउ जुइ ।स्कटल्यान्डय् थज्याःपिं चखंपिं क्वः लुइकूगु दु, गुपिं खनाः वैज्ञानिकत हे छक्क जुयाच्वंगु दु ।

थ्व क्वःतय्सं नयेगु चूलाकेगु निंतिं ज्याभः दयेकाः छ्यले तकं सः । थुमिसं न्या काकेगु हुक दयेकाः न्या तकं लायेसः ।थथे वैज्ञानिकतय्सं अज्याःपिं क्वः नं लुइकूगु दु, गुम्हेस्यां वैज्ञानिकतय्सं दयेकातःगु छगः मेसिन छ्यलाः थःत माःगु नसा चूलाकेफु ।झंगःपंछितय् बुद्धिमता परीक्षण यायेगु निंतिं वैज्ञानिकतय्सं छगः वेंन्डिग मेसिन दयेकातःगु दु ।

थ्व मेसिनया छखेपाखे भ्वँ छकू कुचा कुर्कल कि मेखेरं नसां ज्वलं कुतुं वयाः छगः बाक्सय् च्वं वइ । क्वखं थ्व मेसिनयात बांलाक हे छ्यलाः थःत माःगु नसा चूलाकाच्वंगु दु । वैज्ञानिकतय्सं थथे यायेसःम्ह छम्ह क्वःया नां एमा धकाः बियातःगु दु । एमां न्ह्यःने तयातःगु भ्वँयात कुचा कुचा याइ, अले मेसिनया छखेरं कुर्काः बी, अले मेखेरं कुतुं वंगु ला कयाः नइ ।

थुलि जक मखु, वैज्ञानिकतय्सं थनया क्वःतय्सं नयेगु निंतिं थःगु न्ह्यपु छ्यलाः ज्या यानाच्वंगु नं रेकर्ड याःगु दु । क्वःतय्सं थःम्हं नयेमाःम्ह कीयात छपु कथिं उबलय् तक कुतिकुति यानाच्वनी, गुबलय् तक व की हीमी चायाः सुम्क च्वनीमखु । की सुम्क च्वनकि क्वखं वयात नयाछ्वइ ।

वैज्ञानिकतय्सं थःपिंसं दयेकागु वेंन्डिङ मेसिन क्वखं छ्यःगु खनाः धाथें उपिं चलाखपिं पंक्षी जूगु निष्कर्ष पिकाःगु खः ।वैज्ञानिकतय्सं झंगःपंक्षीतय् बुद्धिमता परीक्षण यायेगु निंतिं न्यू क्यालेडोनिया धाःथासय् छगू विशाल पंजः दयेकूगु खः । थ्व पंजलय् उमिगु बुद्धिमता परीक्षण यायेधुंकाः उमित हाकनं जंगलय् हे त्वःताबिउगु खः ।

वेन्डिङ मेसिन दयेकूम्ह क्याम्ब्रिज युनिभर्सिटीया वैज्ञानिक डा. सारा जेलबर्टं क्वःतय् परीक्षण यानागु बारे कनादिल, ‘जिमिसं न्हापां मेसिनय् कुर्केगु निंतिं ठीक साइजया भ्वँया कुचा न्ह्यःने तयातयागु खः । उमिसं थ्व भ्वँ मेसिनय् कुर्काः नसा ज्वलं पिकाये सयेवं जिमिसं छकू तकूगु भ्वँ न्ह्यःने तयाः उमिसं भ्वँ कुचा याये सइकि सइमखु धकाः स्वया ।’

वैज्ञानिकतय्सं थ्व परीक्षण च्याम्ह क्वःतय्त याःगु खः । डा. जेलबर्टं धयादिल, ‘उपिं च्याम्हेसिनं ठीक साइजय् भ्वँ कुचाः याये सयेकल, अले मेसिनय् भ्वँ दुछ्वयाः ला कुर्काः नल ।’