येँ–हेटौंडा सुरुङ मार्ग प्रदेश सरकारयात बीत माग

येँ – येँ–हेटौंडा सुरुङ मार्ग दयेकेगु ज्या प्रदेश सरकारयात बीत माग याःगु दु । राष्ट्रिय सभाया दुजः राधेश्याम अधिकारीं केन्द्र सरकार समक्ष उगु आयोजना प्रदेश सरकारयात बीत माग यानादीगु खः । प्रदेश नं. ३ सरकारं आयोजना दयेकेगु निंतिं तःगु प्रस्ताव स्वीकृत यायेत वय्कलं इनाप यानादीगु खः ।

खुदँ न्ह्यवंनिसें प्यदँया दुने ज्या क्वचायेके धकाः तयारी याःगु थ्व आयोजनाय् थौंतक नं छुं मयासे च्वनाच्वंगु धासें वय्कलं आः प्रदेश सरकारं दयेके धाःबलय् केन्द्र सरकारं उकियात ग्वाहालि यायेमाः धयादीगु खः । वय्कलं खुदँ तक ज्या मयासे च्वनाच्वंगु कम्पनी लिसेया सम्झौता रद्द यानाः प्रदेश सरकारयात दयेके बीमाःगु बिचाः नं तयादिल ।

कान्ति लोकपथ थुगु दँय् क्वचाइगु
येँ–हेटौडा स्वाइगु वैकल्पिक मार्ग कान्ति लोकपथ थुगु हे आर्थिक दँय् क्वचायेकेगु कथं ज्या जुयाच्वंगु दु । आयोजनाया कथं थ्यंमथ्यं ८० प्रतिशत ज्या क्वचायेधुंकूगु दु । निर्माण सामाग्रीया अभाव मजुल धाःसा थुगु हे दँय् क्वचाइगु खँ धाःगु दु । थौंकन्हय् कडा चट्टान दुगु ७ किलोमिटर लँ दयेकेत समस्या जुयाच्वंगु दु । विष्फोटक पदार्थ मदयाः उगु लँपु दयेकेत थाकुयाच्वंगु खँ धाःगु दु ।

आयोजनाया कथं यलया झाँक्री डाँडाय् २.२ किलोमिटर व मकवानपुरया सिमातखुसिपाखे ४.८ किलोमिटरय् अज्याःगु कडा चट्टान तछ्यायेमाःगु दु । नेपाली सेनां ६२ दँ न्ह्यः थुगु सडकया ट्रयाक चायेकाः सरकारयात लःल्हाःगु खः । ९० किलोमिटर ताःहाकःगु लोकमार्ग २० किलोमिटर सडक पीच जुइधुंकूगु दु ।अथेहे सतक ५२ किलोमिटर ग्राभेल जुइधुंकूगु दुसा ७ किलोमिटर चिब्यागु लँ जुयाः एकतर्फी जक चले जुयाच्वंगु दु ।

आयोजनाया कथं वइगु चैत तकया दुने ७२ किलोमिटर सडक पीच यायेगु योजना दु । आयोजनाया कथं वैशाख न्ह्यः कान्तिलोकपथय् तग्वःगु सवारी साधन चले याये फइ । न्याला तक चट्टान तछ्यायेत ई काइगु जूगुलिं वैशाख न्ह्यः तग्वःगु सवारी साधन चले यायेत समस्या जुइगु खँ धाःगु दु । थौंकन्हय् चिग्वःगु सवारी चले जुयाच्वंगु दुसा तग्वःगु बस ७ किलोमिटर खण्डय् वान वे कथं चले जुयाच्वंगु दु । २०१३ सालय् जुजु महेन्द्रं उगु राजमार्गया शिलान्यास याःगु खः । सरकारं २०६५ सालय् लोकमार्ग नां बियाः सडक दयेकेगु ज्या न्ह्याकूगु खः ।