ने. सं. ११४६ बछलाथ्व सप्तमी -

स्वसःत्या दँ लिपा नेपाल बज्रयान महाविहार संघ स्थापना

धर्मराज बज्राचार्य

बौद्ध धर्म कथं विहार (बहाः—बही) संचालन यायेत संघ स्थापना जुइमाः । गन विहार दु अन संघ दइ, गन संघ दइ अन धर्म ल्यनाच्वनी, गन धर्म दइ अन बुद्ध दइ । त्रिशरण मध्येय् संघं शरणं गच्छामिया अर्थ विहारया संघया शरणय् वने धाःगु ख । विहारया संघ धयागु थौंकन्हय् जिल्ला प्रशासनय् दर्ता जुयाः नीस्वने फइगु गैरनाफामूलक संघ–संस्था थेंज्याःगु मखु धयागु सकसिनं सिउ हे जुइमाः ।

गन विहार दइ, अन संघ दइ । अथे जूगुलिं नेपाल मण्डलय् गुलि नं मूबहाबही, कचाबहाःत दु, अन प्रत्येक बहाः–बहिलिइ तःधंगु–चिधंगु संघ नं दु ।”थ्यंमथ्यं स्वसःत्या दँ लिपा थौं झी सकसिगुं मंकाः कुतलं नेपाल परम्परागत बौद्ध धर्म संघया ग्वसालय् नेपाल वज्रयान महाविहार निर्माण मूल समितिपाखें लुम्बिनीइ नेपाल बज्रयान महाविहार निर्माण जुयाच्वंगु सकसिनं सिउगु हे जुल ।

विहारया न्हापांगु तल्ला थ्यंमथ्यं पूवंक क्वचाःगु, मातंया अंगः दनेगु ज्या क्वचायाः पसूकाझ्याः, तिकिझ्याः, लुखा जक तये ल्यंदनि । लीपौ छुनाः लुँगजू पलिस्था यानाः पलिं चिइ क्वचाःगु नं निदँ फुइधुंकल । बज्रधातु चैत्य, क्वाःपाःद्यः, वज्रधातु मन्दः, वज्रसत्व, सहस्रभुजलोकेश्वरया पलिस्था नं जुयाः, वज्रधातु चैत्यया निक्वःगु बुसादं, क्वाःपाःद्यःया न्हापांगु बुसादं तक नं जुइधुंकूगु दु ।

दिगिछेँ (समाधिगृह।ध्यानागार) नं धस्वानाः, पुरश्चरण (गुह्य रुपं समाधी अभ्यास) च्वनेगु ज्या जुइधुंकूगु दु । बःचाः हाकयेक धायेगु खःसा औपचारिक रुपं विहार संचालनया ई त्यःगु जुल । नेपाःयागु बौद्ध धर्मया इतिहासय् येँया हेनाकर महाबिहार (ढोकाबहाःया कचाःबहा) गुणाकर महाविहार (छुस्याबहा) हे दकलय् लिपायागु बिहार ला धयाथें च्वं ।

उगु विहार बाज्या गुणाज्योतिं दयेकेगु शुरु याःगु खःसा छय् पलिख देवं ने.सं. ७८७ स दयेके क्वचायेकूगु खः । जुजु प्रताप मल्लया उपस्थितिइ विहार पलिस्था जूगु जुयाच्वन । अनं लिउ पूवंगु बहाः–बही निर्माण जूगु मदु ला धया थें च्वं ।अथे जूगुलिं वंगु वैशाख १४ गते नेपाल परम्परागत बौद्धधर्म संघया निर्णय कथं नेपाल वज्रयान महाविहारया सांघिक कार्य न्ह्याकेया लागिं नेपाल बज्रयान महाविहार संघ स्थापना जूगु जुल ।

संघय् दुने आःयात चक्रेश्वर छम्ह, चक्रेश्वरी छम्ह, महास्थविर (थाय्पा आजु) प्यम्ह, स्थविर (थाय्पा) प्यम्ह यानाः जम्मा झिम्हया मूल संघ गठन व पद स्थापना (आसंत्यलेगु) ज्या जूगु जुल । उगु संघय् नेपाल परम्परागत बौद्धधर्मया संस्थापक अध्यक्ष, नेपाल वज्रयान महाविहार निर्माण मूल समितिया अध्यक्ष श्रद्धेय प्रा. डा. नरेश गुरुजुयात चक्रेश्वर व नीता गुरुमांयात चक्रेश्वरी पदय् मनोनित याःगु जुल ।

नेपाल परम्परागत बौद्धधर्म संघया तत्कालिन व्यवस्था कथं महास्थविर व स्थविरपिनिगु न्यूनतम योग्यता क्वय् बिया कथंया जुइमाः —
१) नेपाल मण्डलया आधिकारिक महायान, वज्रयान विहारया सर्वसंघ जुइमाःगु ।
२) दीक्षा (देखा) प्राप्त जुइमाःगु ।
३) नेपाल परम्परागत बौद्धधर्म संघया केन्द्र वा शाखाया सदस्य जुइमाःगु ।
४) नेपाल परम्परागत बौद्धधर्म संघया ग्वसालय् गुरुयोग, सप्तविधानुत्तर ध्यान, षडक्षरी मन्त्र ध्यान, श्री चक्रसम्बर (त्रिसमाधि, चण्डाली) व योग प्राप्त जुइमाःगु ।

अनंलि थुगुसीया स्वांयाः पुन्हि (बैशाख पुन्हि) या भिंगु दिनस लुम्बिनीइ नेपाल वज्रयान महाविहारय् वसपोल चक्रेश्वर, चक्रेश्वरी, महास्थविर, स्थविरपिंत उगु पदया अभिषेक धालसां चक्रेश्वर–चक्रेश्वरी अभिषेक, महास्थविराभिषेक, स्थविराभिषेक (थाय्पा लुइगु) ज्या नेपाःया बौद्धधर्म कथं क्वचाःगु जुल ।

अनंलि विहार निर्माण सांघिक कार्य व सम्बन्धित पूजाविधि सम्पादनया लागि आचार्य परिषद्या गठन जुल । गुगु परिषदय् आःयात मूगुरुजु छम्ह, मूगुरुमाजु छम्ह, गुरुजु व गुरुमाजु १७ म्हया व्यवस्था कथं विहार निर्माण पूजाविधिइ न्हापां निसें योगदान बियावयाच्वंपि गुरुजु गुरुमांजुपिं हे क्वय् न्ह्यथनाकथं मनोनित जूगु जुल ।

मू गुरुजु प्रा. डा. नरेश मान, मू गुरुमाजु नीता, गुरुजु उत्तम बज्र, मञ्जुश्री रत्न, भीम रत्न, दश रत्न, विकासरत्न, बिजेन्द्रमुनी, त्रिरत्न, दीपेन्द्र, राजभाई, अनूपवीर, गुरुमाजु जेनिया, सरला, रबिता, रुपा, सरला ।वयां लिउ विहारया निर्माण, व्यवस्थापन, संचालनया लागि २१ सदस्यीय “नेपाल वज्रयान महाविहार संघ” अन्तर्गत नेपाल बज्रयान महाविहार संचालन नं निम्नानुसार गठन, मनोनित व पदासिन नं जूगु जुल ।

अध्यक्ष प्रा. डा. नरेश मान वज्राचार्य, उपाध्यक्ष दिनेश शाक्य (केन्द्रीय महासचिव), पदेन उपाध्यक्ष हेरारत्न बज्राचार्य (कीर्तिपूर शाखा अध्यक्ष), पदेन उपाध्यक्ष अमररत्न बज्राचार्य (ख्वप शाखा उपाध्यक्ष), पदेन उपाध्यक्ष रेमरत्न बज्राचार्य (येँ शाखा अध्यक्ष), पदेन उपाध्यक्ष बुद्धरत्न महर्जन (अमेरीका नेपाल परम्परागत बौद्धधर्म संघ, मेरीलायण्ड, यू, एस. अध्यक्ष), सदस्य सचिव नेमवीर शाक्य, सहसचिव ज्ञानबहादुर शाक्य, उपसचिव धर्मराज बज्राचार्य, कोषाध्यक्ष पंचवीरसिं तुलाधर, कार्यकारी सदस्यपिं विकासरत्न बज्राचार्य, ई. अन्नपूर्ण स्थापित, ई. बिद्यारत्न बज्राचार्य, सप्तमान बज्राचार्य, मदनकाजी शाक्य, सूवर्णमुनि शाक्य (रुपन्देही–पाल्पा शाखा सदस्य) ।

येँदेया थाय्पाः, प्रा. धूपरत्न बज्राचार्य, रत्नाकर महाविहार यलया चक्रेश्वर सिद्धिरत्न बज्राचार्य, चतुब्रम्ह महाविहार ख्वपया चक्रेश्वर हेराचन्द्र बज्राचार्य, थिमि देय्थाय्पा हेराबज्र बज्राचार्य व नरेशगुरुजुया शिष्यपिं केन्द्र व शाखाया प्रतिनिधि सदस्यपिनिगु पाखें नरेश गुरुजु व नीता गुरुमायात लसकुस यासें उदक, पंचबुद्ध मुकुट, बज्र, घण्ट, नाम, चक्रेश्वर मकूट (उद्यां तपुलि) व छत्राभिषेक प्रदान याःगु जुल ।

थ्वयांलिउ चक्रेश्वर व चक्रेश्वरीपाखें छसिकथं शंखरत्न, उत्तमवज्र, पुष्परत्न व संघरत्नयात महास्थविराभिषेक प्रदान याःगु जुल । अथे हे मञ्जुश्रीरत्न, विकासरत्न व राजभाईयात स्थविराभिषेक प्रदान याःगु जुल ।निकट भविष्यय् मूसंघय् ५३म्ह दुजःया व्यवस्था जुइ । उगु संघय् मिसापिंत नं स्थान बिइगु जुइ । थुकथं मिजं व मिसापिनिगु संयुक्त संघ जुइ ।

मानार्थ संघ व साधारण संघया नं व्यवस्था जुइ । जजमान (उपासक–उपासिका) संघया नं व्यवस्था जुइ । संचालन समितिइ मानार्थ सल्लाहकार समितिया व संरक्षक समितिया नं व्यवस्था जुइ । थुकथं नेपाल वज्रयान महाविहार झी सकल नेपाःमिपिनिगु मंकाः विहार जुइ । आशा दु, थुगु विहारं नेपाल बौद्धधर्मया विकास, संरक्षण, संवद्र्धन यानाः नेपाःमितय्गु म्हसिका हलिमय् न्यंकेगु ज्या जुइ ।
च्वमि नेपाल बज्रयान महाविहार संघ, संचालन समिति, लुम्बिनीया उपसचिव खः ।