विद्यार्थी व कलेज
एसईईया लिच्वः पिहां वयेवं शिक्षा ख्यलय् मोहनि शुरु जुइ । थीथी ग्रेड हयाः पास जूपिं प्यंगू लाख विद्यार्थीतय्त सालेगु लागिं फुक्क हे कलेजतय्सं जिक्व बः पिकयाः जाः वांछ्वयेगु मौसम नं थ्वहे खः । थ्व इलय् विद्यार्थीतय्त आकर्षित यायेया लागिं कलेजतय्सं थज्याः थज्याःगु खँ पित हइ कि विद्यार्थीतय्सं मांअबुं धाःगु खँ तक हे मन्यँसे वहे कलेजया धापू लिउ लिउ ब्वाँय् वनी ।
उकिं थज्याःगु अवस्थाय् गन कलेजय् ब्वंसा जी धकाः च्वाइस यायेगु ज्या तसकं थाकु । छेँय् यदि भचा बांलाक गाइड यायेगु व्यवस्था मजुल धाःसा विद्यार्थीतय्सं विज्ञापनयात हे मू आधार दयेकी । अले उकिया हे लिउ लिउ वनाः कलेज च्वाइस याइ गुगु पाय्छि हे जुइ धइगु छुं ग्यारेन्टी मदु ।
गुलिं विद्यार्थीत ला थज्याःपिं नं पिहां वइ गुपिं कलेजया बांलाःगु भवन जक स्वयाः हे मख्ख जुइ व जि ला थन हे ब्वनेगु धकाः जिद्दी याइ । थौंकन्हय्या कलेज भवन गुगुं फाइभ स्टार होटल स्वयां कम मजू । उकिया चमक दमकं हे विद्यार्थीयात ईई पंका बी । गुलिं विद्यार्थी थः यःम्ह पासा गन वन, जि नं अन हे वने धाइपिं नं पिहां वइ ।
थ्व पूरा हे ईई पनीगु ई खः । तर कलेज च्वाइस यायेबलय् अभिभावकया आर्थिक अवस्था छु दु धइगु खँयात नं विद्यार्थीतय्सं ध्यान बीमाः । छाय्धाःसां १० कक्षा ब्वनाच्वंगु इलय् तक अभिभावकं गुलि ध्यबा खर्च याइगु खः, ११ य् वनेसातकि उकिया अनुपात अनुमान हे याये मफयेक पायेधुंकी । व हैसियत अभिभावकयाके दु लाकि मदु, थ्व नं ध्यान बीमाःगु विषय जुइ ।
विज्ञापनया चमक दमकय् जक ब्वाँय् जुल धाःसा थ्व पक्षयात ध्यान बी खनी मखु । शिक्षाविद्तय्सं धाइ, पढाई बांलाः लाकि बांमलाः धइगु खँया न्हापांगु निर्धारण विद्यार्थी थम्हं हे यायेमाः । यदि विद्यार्थी थः हे बांलाक ब्वनीम्ह जुल धाःसा वयात कलेज न्ह्यागु जूसां मतलब दइ मखु । विद्यार्थी मब्वनीम्ह जुल धाःसा वयात न्ह्यागु हे कलेजय् तया बिउसां वं बांलाःगु ल्याः हये फइ मखु ।
बांलाःगु धाःगु कलेजतय्सं बांलाःपिं हे जक विद्यार्थी काइ । अप्वः नम्बर हयाः एसईई पास जूपिं विद्यार्थीतय्त ध्यबा हे बियाः न्याना काइ । जब वं काइपिं विद्यार्थीत हे बांलाःपिं खःसा व कलेजं पिकाइगु लिच्वः अवश्य हे बांलाइ । थुकियात कलेज हे बांलानाः बांलाःगु लिच्वः वःगु खः धाये फइ मखु । थ्व ला बांलाःपिं विद्यार्थीत वंगु जुयाः कलेजया लिच्वः बांलाःगु पिहां वःगु खः ।
थुकिं क्यनी कि केवल कलेजं जक विद्यार्थीयात बांलाकीगु मखु । बरु विद्यार्थीं कलेजयात बांलाका बीगु खः । बांलाःपिं विद्यार्थीत हयाः कलेजं थः बांलाः धकाः विज्ञापन याइगु खः । उकिं विद्यार्थीतय्सं थुइकेमाः, बांलायेमाःगु कलेज मखु, बांलायेमाःगु ला स्वयम् थः खः । यदि थः बांलात धाःसा कलेज छगुलिं बांलाइ । बांलाःपिं विद्यार्थीतय्गु कारणं कलेज बांलाइगु खः ।
थौंकन्हय् तःधंगु व नांजाःगु धाःगु कलेजतय्सं विद्यार्थीतय्त बीगु न्हापांगु ग्यारेन्टी खः, थन ब्वन धाःसा विदेश वनेत अःपुइ । अन भर्ना जू वनीपिं विद्यार्थीतय्गु न्हापांगु ‘कन्सर्न’ नं वहे जुयाच्वनी — थन ब्वनां विदेश वने खनी लाकि खनी मखु ? झीगु कलेजतय्गु शिक्षा थःगु देशया सेवा याइपिं जनशक्ति तयार यायेगुपाखे मखु विदेशया सेवा याइपिं जनशक्ति तयार यायेगुपाखे लक्षित जुयाच्वंगु दु ।
गुगु कलेजय् ब्वनीपिं ग्वःम्ह विद्यार्थी विदेश वनेत सफल जूगु दु, उकिया हे आधारय् कलेजतय्गु नं सफलता नापे यायेगु ज्या जुइ ।
थुकिया दोष कलेजतय्त बियां मजिउ । दोष राज्ययागु हे खः । छाय्धाःसां लखौं तका खर्च यानाः दँ दँ तक आखः ब्वनां नं ब्वंपिं विद्यार्थीतय्त बांलाःगु रोजगारी राज्यं बी मफु ।
उकिं थःपिंसं ब्वनां हासिल यानागु सीपया सदुपयोग यायेगु खःसा थौं विदेश वनेगु बाहेक मेगु विकल्प विद्यार्थी व अभिभावकं खंकाच्वंगु मदु । आखः ब्वनेगु धइगु हे विदेश वनेत खः धइथेंज्याःगु थुइका आः जुयाच्वंगु दु । प्यंगू लाख विद्यार्थी छक्वलं पास जूगु थ्व इलय् सु गन ब्वनेगु धइगु अन्यौल विद्यार्थीतय्त ला द हे दु, नापं कलेजतय्त नं थ्वहे इलय् सु सु विद्यार्थी ज्वने माली धइगु धेंधेंबल्लाः नं दु ।
बांलाःपिं विद्यार्थी हये फत धाःसा फलाना विद्यार्थी जिमिगु कलेजय् ब्वं वल धकाः विज्ञापन याये दइ । अले वहे विद्यार्थीयात स्वयाः मेपिं विद्यार्थी उगु कलेजय् ब्वं वनी । आखिर विद्यार्थीत कलेज स्वयाः मखु विद्यार्थी हे स्वयाः कलेजय् भर्ना जू वनीगु लानाच्वन । थुकिं नं थ्वहे धाइ कि मू खँ विद्यार्थी थःहे खः ।
यदि विद्यार्थी बांलात धाःसा उपिं कलेजया लिउ लिउ जुइम्वाः, कलेज हे उमिगु लिउ लिउ ब्वाँय् वइ । हरेक विद्यार्थीं थः दुने थ्व आत्मबल विकास याये फत धाःसा कलेज मालेगु ज्याय् अलमल जुयाच्वनेगु झंझटपाखें उपिं मुक्त जुइ ।
LEAVE YOUR COMMENTS