रसुवागढी आयोजनाया ज्या ७० प्रतिशत क्वचाल
येँ – रसुवागढी जलविद्युत आयोजनाया ७० प्रतिशत ज्या क्वचाःगु दु । आः तक आयोजनाया ४ हजार २ सय मिटर सुरुङ म्हुइगु ज्या क्वचायेधुंकूगु दु । बाँध दयेकेगुया लिसें मेगु पूर्वाधारया ज्या नं न्ह्यानाच्वंगु दु । आयोजनाया आः ३० प्रतिशत जक ज्या दनिगु खँ आयोजनां धाःगु दु । आयोजनां १११ मेगावाट मत उत्पादन यायेगु क्षमता दु ।
आयोजनाया कथं वइगु झिंच्यालाया दुने आयोजनाया ज्या क्वचाइगु खँ धाःगु दु । आयोजनां २०७६ फागुन ७ गते दुने मत उत्पादन यायेगु आज्जु तयातःगु दु । वा वयाः सडक अवरुद्ध जूगुलिं सिमेन्ट व डण्डीलगायत निर्माण सामाग्री आपूर्ति यायेगुलिं समस्या वःगु खँ आयोजनां धाःगु दु ।
आयोजनाया कथं भण्डारण यानातःगु सामान फुइगु अवस्था वःगु व सडक अवरुद्ध जुयाः थप आपूर्ति यायेत समस्या जुयाच्वंगु खँ धाःगु दु ।
आयोजना दयकेगु ज्या चाइना वाटर एन्ड इलेक्ट्रिसिटी कर्पोरेशन (सीडब्ल्यूईं) यानाच्वंगु दु । अथेहे इलेक्ट्रो मेकानिकलया ठेक्का भारतया भ्वाइथ हाइड्रो लिमिटेडं यानाच्वंगु दु ।
आयोजना दयेकेत ब्याज बाहेक १३ अर्ब ६८ करोड तका तुइगु खँ धाःगु दु । आयोजनापाखें दँय् ६१ करोड ३८ लाख युनिट मत उत्पादन जुइगु खँ धाःगु दु । कम्पनीं सर्वसाधारण व आयोजना प्रभावित स्थानीय वासिन्दायात २५ प्रतिशत अर्थात १ अर्ब ७१ करोड तका बराबरया १ करोड ७१ लाख कित्ता शेयर (आईपीओ) निष्काशन यायेत्यंगु दु ।
सर्वसाधारणयात १५ प्रतिशत व १० प्रतिशत शेयर निष्काशन यायेत्यंगु खः । रसुवाष्ढी न्हापांगु व निगूगु चरण यानाः १ अर्ब ६४ करोड तका बराबरया १ करोड ६४ लाख कित्ता शेयर निष्काशन यायेधुंकूगु दु । गुकिं न्हापांगु चरणय् कर्मचारी सञ्चय कोषया संचयकर्तायात शेयर बिउगु खः । निगूगु चरणय् संस्थागत लगानीकर्ता कथं नेपाल विद्युत प्राधिकरण, चिलिमे जलविद्युत कम्पनी लिमिटेडपिंत शेयर बिउगु खः ।
आयोजनाय् चिलिमे हाइड्रो पावर लिमिटेडया ३३ प्रतिशत, नेपाल विद्युत प्राधिकरणया १८ प्रतिशत, सर्वसाधारणया १५ प्रतिशत, आयोजना प्रभावित स्थानीय वासिन्दायात १० प्रतिशत, कर्मचारी सञ्चयकोषया लगानीकर्तायात १९ प्रतिशत व सञ्चकोषया कर्मचारी व विद्युत प्राधिकरणया कर्मचारीयात ३ प्रतिशतया दरं शेयर बाँडफाँड याइगु खँ धाःगु दु ।
LEAVE YOUR COMMENTS