योग्यम्ह मांया योग्यम्ह म्ह्याय्

एजेन्सी- बलिउडया लोकंह्वाःम्ह अभिनेत्री श्रीदेवीया म्ह्याय् जान्ह्वी कपूरया डेब्यु फिल्म ‘धडक’ शुक्रवाः रिलिज जुल । मराठी भाय्या सुपरहिट फिल्म सैराटया हिन्दी रिमेक थ्व फिल्मयात कयाः समालोचक व दर्शकतय्सं मिश्रित प्रतिक्रिया बियाच्वंगु दु । फिल्मं न्हापांगु न्हि कुन्हु साढे आठ करोड दां उठे याःगु दु ।
श्रीदेवी व बोनी कपुरया म्ह्याय्या फिल्म जूगुलिं थ्व फिल्मं गुलि कमाइ याइ धकाः सकसिया ध्यान वनाच्वंगु दु ।
शशांक खेतानं निर्देशन याःगु थ्व फिल्म निगू बिस्कं बिस्कं समुदायया निम्ह ल्यासे ल्याय्म्हतय् मतिनाया बाखंया फिल्म खः ।
समालोचक व दर्शकतय् मिश्रित प्रतिक्रिया वःसां बलिउडया सेलिब्रिटितय्सं धाःसा फिल्मयात कयाः तसकं च्वछायाच्वंगु दु । जावेद अख्तर व सवाना आजमी थेंज्याःपिं दिग्ग्ज फिल्मकर्मीतय्सं धडकया तारिफ याःगु दु ।
जावेद अख्तरं छगू ट्विटय् जान्ह्वीया तारिफ यासें छम्ह योग्यम्ह मांया योग्यम्ह म्ह्याय् धाःगु दु ।