चीन लिसे स्पष्ट अडान कयागु दु : प्रम ओली
येँ (नेपालभाषा टाइम्स)/ प्रधानमन्त्री केपी शर्मा ओलीं चिनियाँ राष्ट्रपति सि जिनपिङयात नापलायेगु झ्वलय् लिपुलेकयात कयाः भारत व चीन दथुइ जूगु सम्झौतायात कयाः प्रस्ट रुपय् असहमति प्वंकागु खँ धयादीगु दु । म्हिगः पार्टीया निक्वःगु विधान महाधिवेशनयात सम्बोधन यायेगु झ्वलय् वय्कलं उगु खँ धयादीगु खः । वय्कलं चीन लिसे अडान कयाःगु अडियो, भिडियो व निगू देय्या नोटय् दुगु खँ नं धयादीगु दु ।
थम्हं असहमति तयेधुंकाः चिनियाँ राष्ट्रपति जिनपिङं नेपाःया सार्वभौमसत्ताय् उखेथुखे मजुइगु लिसः बिउगु खँ नं प्रम ओली धयादिल । प्रम ओलीं धयादिल, ‘छिकपिंत लाःगु आशंकाय् जिमिगु ध्यान दु । नेपाःया सार्वभौमसत्ता उखेथुखे जुइ मखु, याके नं बीमखु । जिमिसं समर्थन याना । सिमानाया विषय नेपाः व भारतया खः । छिकपिंसं कुटनीतिक रुपं समाधान याः धयादिल ।’ लिसें वय्कलं थःम्हं भारत भ्रमणया इलय् नं स्पष्ट रुपं लिपुलेकया खँ ल्ह्वनेगु धयादीगु दु ।
म्हिगः जूगु विधान महाधिवेशनया झ्वलय् पुलांम्ह राष्ट्रपति विद्यादेवी भण्डारीया विषयय् छु्ं नं कथंया सहलह मजुइगु खँ नं प्रम ओली धयादीगु दु । महाधिवेशनय् तयेगु खँ विधान अधिवेशनय् तयेगु उचित मजुइगु खँ ओलीं धयादीगु खः ।
थ्वहे झ्वलय् म्हिगः पुलांम्ह राष्ट्रपति भण्डारीं विधान अधिवेशनय् ब्वति काःपिंत पौ च्वःगु दु । भण्डारीया समर्थकतय्सं भण्डारीं च्वःगु पौ अधिवेशनय् ब्वति काःपिं प्रतिनिधितय्त इनेगु ज्या याःगु खः । पतिइ थःगु सदस्यता बारे न्ह्यसः थंगु धासें पौ थःगु आत्म रक्षाया निंतिं मखुसे पार्टीया उज्ज्वल भविष्यया निंतिं जूगुलिं थःगु अधिकारया रक्षा पार्टीयात सबल याकेगु निंतिं धकाः थुइकी धयागु विश्वास यानाच्वना धयातःगु दु ।
LEAVE YOUR COMMENTS