अवकाश उमेर ५८ कि ५९

मन्त्री व सांसदतय् विवाद

येँ (नेपालभाषा टाइम्स)/ संघीय मामिला तथा सामान्य प्रशासनमन्त्री व सांसदतय् दथुइ टकराव जुइवं कर्मचारीतय् अवकासया उमेर गुलि यायेगु धयागु खँ म्हिगः नं क्वःछीमफुत । राष्ट्रिय सभा अन्तर्गतया विधायन व्यवस्थापन समितिया म्हिगःया बैठकय् नं सामान्य प्रशासन मन्त्री भगवती न्यौपाने उमेर हद ५९ दँ यायेमाः धयागु खँय् तसमस मजुइवं बैठक निष्कर्षविहिन जूगु खः । मन्त्री न्यौपानें थ्व विषयय् सहलह यानाः पुनर्बिचाः यायेत थौं तक ई फ्वंगुलिं समितिया सभापति तुलसाकुमारी दाहालं थुकिया बारे थौं सहलह यानाः निर्णय यायेगु खँ धयादीगु दु ।
समितिं निजामति कर्मचारीतय् अवकाशया उमेर ५८ दँय् क्वकायेगु निर्णय यानातयेधुंकूगु दु । संघीय निजामति सेवा विधेयकया दफा ५८ य् निजामति कर्मचारीतय्‌त ५८ दँय् अवकाश बीगु खँ दुथ्याकातःगु दु । थुकियात समितिं सर्वसम्मतिं निर्णय यानातयेधुंकूगु खः । तर मन्त्री न्यौपाने धाःसा अवकाशया उमेर दछि तनेगु अडानय् दु । न्हापा अवकाशया उमेर ६० दँ यानातःगुली उकियात क्वपालाः ५८ दँ यायेवं कर्मचारीतय्‌सं विरोध याना वयाच्वंगु खः । मन्त्री न्यौपानें राष्ट्र सेवक कर्मचारीतय्‌त ज्याय् लगे यायेत उत्साहित यायेमाःगुलिं छुं खँय् ललिचो जुयाबीत सांसदतय्‌त इनाप यानादीगु दु । तर सांसदतय्‌सं धाःसा समितिइ सहमति जुइधुंकाः बुँदा हिलाबुला यायेगु निंतिं चलखेल जूगु खँ धाःगु दु । समितिया दुजः माओवादी केन्द्रया सांसद झक्कु सुवेदी समिति धयागु मिनि संसद जूगुलिं थुकियात मन्त्री निर्देशन यायेदइमखु धासें सहमति जुइधुंकूगु विषयय् विवाद मयायेत धाःगु दु ।
थ्व विषयय् सहलह यायेत समितिया बैठक थौं ९ बजे च्वनेगु क्वःछिनातःगु दु।