निजी स्कुलपाखें आन्दोलन घोषणा
येँ/ विद्यालय शिक्षा सम्बन्धी विधेयक–२०८० संसदया शिक्षा, स्वास्थ्य तथा प्रविधि समितिइ अन्तिम सहलह यायेत्यंगु इलय् निजी विद्यालयतय् निगू संगठन प्याब्सन व एन–प्याब्सनं मंकाः आन्दोलन याइगु जूगु दु । म्हिगः निगुलिं संगठनं मंकाः पत्रकार सम्मेलन मार्फत न्यागू बुँदाया माग न्ह्यब्वयाः आन्दोलन घोषणा याःगु खः ।
निजी विद्यालय संगठनतय्सं थःपिनि अस्तित्व व योगदानयात वेवास्ता यायेकथं विधेयकय् अव्यवहारिक व अन्यायपूर्ण प्रावधान तःगु द्वपं बिसें उकियात खारेज यायेमाःगु माग याःगु दु ।
उमिसं न्ह्यथंगु न्यागू बुँदे मागया न्हापांगु बुँदाय् ‘पूर्ण छात्रवृत्ति’ धइगु खँग्वः चीकेमाःगु, विद्यालयय् उत्पादन मजुइगु पोसाक, स्टेशनरी, शैक्षिक सामग्री, खाजा उपलब्ध याकेमाःगु प्रावधान खारेज यायेमाःगु, कम्पनी ऐन कथं दर्ता जुयाः चले जुयाच्वंगु विद्यालययात ‘गैर नाफामूलक’ दयेकेगु प्रावधान चीकेमाःगु माग याःगु दु ।
उकथं हे छात्रवृत्ति इनेगु अधिकार सम्बन्धित विद्यालययात हे जुइमाःगु, तर पालिकाया प्रतिनिधिपिं समेत च्वनाः पारदर्शी समिति दयेकाः इनेगु ज्या याये फइगु व ४५ प्रतिशत आरक्षणया प्रावधान खारेज यायेमाःगु माग नं उमिसं याःगु दु ।
एन–प्याब्सन अध्यक्ष सुभाष न्यौपाने व प्याब्सनया अध्यक्ष कृष्णप्रसाद अधिकारीं हस्ताक्षर यानाः पितबिउगु विज्ञप्तिइ थौं सुथय् ११ बजे निसें १ बजे तक फिब्वख्यःनिसें न्हू बानेश्वर दुवातय् तक ब्यानर र्याली पिकयाः कोणसभा यायेगु, कन्हय् देय्न्यंकंया स्कुल बस सतक हयाः नगर परिक्रमा यायेगु व ८ गते निर्णायक आन्दोलन यायेगु खँ न्ह्यथनातःगु दु ।
सरकारं विद्यालय शिक्षा विधेयक संसदय् पेस यायेगु तयारी यानाच्वंगु इलय् निजी विद्यालयतय्सं थ्व असहमति क्यंगु खः । निजी विद्यालय सञ्चालकतय्सं असहमति क्यंगु फुक्कं धइथें बुँदाय् संसदीय समितिइ सहमति जुइधुंकूगु दु ।
LEAVE YOUR COMMENTS