ने. सं. ११४४ कौलाथ्व पारू - नःलास्वनेगु

लुँ काण्डय् एमाले अझ कडा

येँ (नेपालभाषा टाइम्स)- नेकपा एमालेया अध्यक्ष केपी शर्मा ओलीं आः तकया दुने त्रिभुवन विमानस्थलं ३३ क्वःगु तक क्विन्टलका क्विन्टल लुँ पास जुइधुंकल, आः छगू क्लिन्टल लुँ ज्वनाः फुकसित चाःहिकाच्वंगु व फुकसिया ध्यान थुखेपाखे स्वकाः दुनें दुनें हानं मेमेगु ज्या यानाच्वंगु द्वपं बियादीगु दु ।

थ्व स्वयां न्ह्यः नकली चुरोस दुने लुँ सुचका हःपिं तस्करतलिसे माअाेवादीया वरिष्ठ नेता कृष्णबहादुर महरा व वय्कःया कायं सलंसःक्वः खँ ल्हात धइगु समाचार पिहां वयेवं म्हिगः एमालेपाखें थःगु पार्टी ज्याकुथिइ छगू पत्रकार सम्मेलन यासें अध्यक्ष ओलीं थ्व खँ धयादीगु खः । वय्कलं धयादिल, ‘थुलिमछि खँ पिहां वयेधुंकल, उमिके बयान छक्वः हे कायेम्वाःगु ला ? न्यनकेन तक हे यायेम्वाःगु ला ?’

थ्व इलय् गबलें चुरोस, गबलें ब्रेक सु, गबलें लाकामय् तयाः लुँ हयाच्वंगुलिं सरकार फेल हे जुइधुंकल धासें वय्कलं आः गृहमन्त्री नारायणकाजी श्रेष्ठयाके राजीनामा बीगु बाहेक मेगु विकल्प मदुगु खँ धयादिल ।

उकथं हे वय्कलं लुँ तस्करीइ दुथ्याःम्ह मनूयात नागरिकता सुनां बिल धकाः न्ह्यसः तसें उकियात कयाः छानविन यानाच्वंगु फाइल हे गायब याःगु द्वपं नं बियादिल । लुँ तस्करीबारे संसदं दयेकीगु छानविन समिति थःपिंत स्वीकार्य मजू धासें वय्कलं वहालवाला वा पुलांम्ह न्यायाधीशया नेतृत्वय् उच्चस्तरीय स्वतन्त्र छानविन समिति दयेकेमाःगु जिकिर नं यानादिल ।

लुँ तस्करीया खँ पित हयाः एमाले सरकारय् वनेत्यंगु खः लाकि धइगु भ्रम नं पिने दु धासें वय्कलं धयादिल, ‘एमालें सरकारय् वनेत थ्व खँ धयाच्वंगु मखु । एमालेया रुचि सरकारपाखे मदु । एमालेया चिउताः देशपाखे खः । देशया अर्थतन्त्र तसकं स्यनाच्वंगु दु । आः छुं ई लिपा हे मनूतय्सं क्वथा भाडा तक हे पुले मफइगु अवस्था वयेत्यंगु दु । थ्व तसकं ग्यानापुगु स्थिति थ्यनेत्यंगु दु ।’

उकथं हे वय्कलं संसदय् थःपिसं पंगः थनाच्वनागु मखु बरु सत्तापक्षं हे संसद न्ह्याके मबियाच्वंगु द्वपं नं बियादिल ।