वरिष्ठ साहित्यकार वज्राचार्ययात आरबी जोशी फाउण्डेसन प्राज्ञ सम्मान
ख्वप(नेपालभाषा टाइम्स)÷ वरिष्ठ साहित्यकारलिसें बौद्ध विद्वान फणीन्द्ररत्न वज्राचार्य आरबी जोशी फाउण्डेसन प्राज्ञ सम्मानं सम्मानित जुयादीगु दु । नेपाल साहित्य मन्दिरया ग्वसालय् वंगु शनिवाः छगू ज्याझ्वःया दथुइ वरिष्ठ साहित्यकार वज्राचार्ययात उगु सम्मान लःल्हाःगु खः ।
मूपाहांकथं झायादीम्ह नेपाल प्रज्ञा प्रतिष्ठानया उपकुलपति विमल निभाः नं वरिष्ठ साहित्यकार वज्राचार्ययात उगु सम्मान लःल्हानादीगु खः । ज्याझ्वलय् मूपाहां उपकुलपति निभां प्राज्ञ सम्मानया सम्मानपत्र लःल्हानादीगु खःसा फाउण्डेसनया संस्थापकलिसें दाता राजाराम जोशीं सम्मानस्वरुप नीन्याद्वः तका दां लःल्हानादीगु खः । अथे हे साहित्य मन्दिरया पुलांम्ह नायःलिसें वरिष्ठ साहित्यकार तिलकप्रकाश कायस्थं दोसल्ला न्ययेकादीगु खः ।
ज्याझ्वलय् नवासें सम्मानित व्यक्तित्व वज्राचार्यं थः २०१० सालय् सिद्धपुखुस्थित सेनाया ब्यारेकय् आखः ब्वंकेत वयागु खँ कनादिसें उगु इलय् स्थापना जूगु साहित्य मन्दिरलिसे थःगु स्वापू दया वयाच्वंगु लुमन्ति कनादिल । लिसें वय्कलं ख्वपया नांजाःम्ह मदुम्ह कवि पूर्ण वैद्य कवितात्मक निबन्ध च्वये फुम्ह व्यक्तित्व जूगु धासें साहित्य मन्दिरया हे छगू ज्याझ्वलय् कवि वैद्यया सफू पिथनेत इनाप यानाकथं पिहां मवयाच्वंग सफू पिहां वःगु खँय् लसता प्वंकादिल ।
मूपाहां उपकुलपति निभां न्हापा थम्हं नेवाः भासं खँ ल्हाये मफुगु व नवायेत स्वयेगु इलय् भाय् वः धाइगु व कुतः यायां थौं नेवाः भासं नवाये फुगुलिं लसता प्वंकादिसें वइगु दिनय् अझ बांलाक नेवाः भासं खँ ल्हायेत कुतः यायेगु जुइ धयादिल ।
लिसें वय्कलं थः पूर्खा नं ख्वपयापिं हे जूगु धासें ख्वपय् हे वयाः नेवाः भासं नुगःखँ तयेगु ह्वःताः चूलाःगुलिं गौरवया महसुस याना धासें वज्राचार्य थेंज्याःम्ह साहित्यया अविश्राम साधकयात थम्हं सम्मान याये खंगु थः स्वयं हे सम्मानित जूगु नं तायेका धयादिल ।
साहित्य मन्दिरया नायः अगिब बनेपालीं ज्याझ्वःया बारे फाउण्डेसनया संस्थापक लिसें सिरपाःया दाता राजाराम जोशीं फाउण्डेसनया गतिविधि व थीथी ज्याझ्वःया बारे जानकारी बियादीगु खः । ज्याझ्वलय् इन्द्रेणी साहित्य समाजया संयोजक तुल्सीभक्त सुवाल, विराट गुथिया नायः महेन्द्रगोपाल कर्माचार्य, वरिष्ठ साहित्यका डा. योगेन्द्र प्रधान, साहित्य मन्दिरया पुलांम्ह नायः कायस्थं भिंतुना न्वचु तयादीगु खः ।
साहित्य मन्दिरया छ्याञ्जे हरिशरण राजोपाध्यायं लसकुस यानादीगु ज्याझ्वलय् दुजः उत्तमनारायण मल्लं सुभाय् देछानादीगु खः ।
LEAVE YOUR COMMENTS