शरणार्थी प्रकरणय् डा. शाक्यया धापू

येँ (नेपालभाषा टाइम्स)÷बागमती प्रदेशया पुलांम्ह मन्त्री लिसें नेकपा (एमाले) या केन्द्रीय दुजः डा. अजयक्रान्ति शाक्यं थौंकन्हय् चर्चाय् वयाच्वंगु नक्कली भुटानी शरणार्थी प्रकरणय् थःगु छुं नं कथंया संलग्नता मदुगु खँ स्पष्ट यानादीगु दु ।

म्हिगः छगू प्रेस विज्ञप्ति पिकयाः वय्कलं छुं सञ्चार माध्यमतय्सं हिरासतय् लानाच्वंपिं गिरोहया मनूतय्सं बयानया झ्वलय् थःगु नं नां काल धकाः च्वयाहःगु व अथे नां काल धाःपिं मनूत थःगु लागिं पूवंक हे अपरिचित जूगु व उमित थम्हं आः तक गबलें हे नापलायेगु वा खँ तकं ल्हानागु मदुनि धयादीगु दु । थ्व मनूतय्सं थःगु नां छाय् काल वा उमित छाय् नां कायेके बिल धइगु खँय् थः अजूचायाच्वनागु खँ धासें वय्कलं थ्व थःगु चरित्रहत्या यायेगु कुतः जक खः धयादीगु दु ।

थः विशुद्ध राजनीतिक व सामाजिक, सांस्कृतिक ज्याय् आवद्ध जुयाच्वनागु खँ न्ह्यथँसें थः विरुद्ध न्ह्यागु षडयन्त्र जूसां अन्तय् सत्यया विजय जुइगु खँय् थः विश्वस्त जुयागु खँ नं धयादीगु दु ।