दरवार हाईस्कुलय् तरकारि खेती

येँ(नेपालभाषा टाइम्स)- देय्या हे दकलय् पुलांगु शैक्षिक संस्था दरवार हाईस्कुल परिसरय् खेती शुरु याःगु दु । येँ महानगरपालिकां दरवार हाईस्कुल अन्तर्गतया भानु मा.वि. व संस्कृत मा.वि. परिसरय् तरकारि खेती याःगु खः ।

येँ महानगरपालिकां माध्यमिक कक्षाया निंतिं कार्यान्वयनय् हःगु म्हो ईया निंतिं सीपमूलक तालिमया अन्तर्गत तरकारि खेती याःगु खः । सीपमूलक तालिमया निंतिं थ्व योजना अवलोकन योग्य जूगु खँ धाःगु दु ।

मल्ता, तुकं, रामतोरिया थेंज्याःगु तरकारि पिउगु जक मखसे उत्पादन जूगु तरकारि नयेगु नं शुरु यायेधुंकूगु दु । मेमेगु नं आपालं तरकारि विद्यालय परिसरय् पिनातःगु दुसा बुलुहुँ दक्वं तरकारि बांलाक सया वयाच्वंगु खँ धाःगु दु ।

येँ महानगरं वंगु छुं दिं न्ह्यः घोषणा याःगु नमूना विद्यालय अन्तर्गत प्राप्त अनुदानपाखें निगुलिं ब्वनेकुथिइ सहरी व कःसिइ तरकारि खेती याःगु खः । महानगरं नमूना विद्यालय अन्तर्गत न्यागू, न्यागू लख दां अनुदान बिउगु खः ।

खेतीया निंतिं ब्वनेकुथिया हे विद्यार्थीतय् पुचः गठन यानाः विद्यालय परिसरया खाली थासय् तरकारिया पुसा पिनाः खेती याःगु खः । खेतीया निंतिं परामर्शदाता व विज्ञतय् ग्वाहालि नं काःगु खः । तरकारि खेतीया निंतिं हे धकाः विद्यालय परिसरय् निगू टावर नं निर्माण याःगु दु । निगुलिं टावरय् ३५ प्वाः प्वाः खनाः हरेक प्वालय् तरकारिया पुसा पिनातःगु दु ।

लछिया दुने तरकारि उत्पादन शुरु जुइगु व उत्पादन जूगु तरकारि छात्रावासय् प्रयोग यायेगु नापं विक्री नं यायेगु योजना दुगु प्रधानाध्यापक शिव अधिकारी कनादिल । लिसें वय्कलं तरकारि मिया वःगु ध्यबा विद्यार्थी कल्याण कोष दयेकाः संचय यायेगु व विद्यार्थीया हे क्षमता विकासय् खर्च यायेगु योजना दुगु नं कनादिल ।