ने. सं. ११४६ बछलागा तृतीया -

ओलीया धापुतिं न्हूगु परिस्थिति

येँ (नेपालभाषा टाइम्स)- प्रधानमन्त्री पुष्पकमल दाहालं वंगु पुस २६ गतेया प्रतिनिधिसभा बैठकय् एमालेया अध्यक्ष केपी शर्मा ओलीं संसद विघटन पाय्छि खः धकाः धाःगुलिं हे माओवादीं न्हूगु विकल्प माःगु खँ धयादीगु दु । राष्ट्रपतिया उम्मेदवार नेपाली कांग्रेसया नेता रामचन्द्र पौडेलयात त्याकेत बिहीवाः च्यागू दलीय सांसदतय् भेलायात सम्बोधन यासें प्रधानमन्त्री दाहालं थ्व खँ धयादीगु खः । ‘ओलीया बिचाः न्यनेधुंकाः जिमित सोचे यायेत बाध्य यानाबिल’, प्रधानमन्त्री दाहालं धयादीगु दु ।

सम्बोधनया झ्वलय् वय्कलं धयादिल, ‘जिगु निंतिं प्रधानमन्त्री पद तःधंगु खँ मखु, संविधान व लोकतन्त्रया रक्षा तःधंगु खँ खः । पुस २६ गते संसदय् जिं प्रधानमन्त्रीया रुपय् विश्वासया मत कयाच्वनागु इलय् ओलीजुं संसदय् गुगु न्ववानादिल, उकिं मनय् चसक्क जुल । जिपिं संसद् विघटनया विपक्षय् दुपिं खः, अले तःधंगु संघर्ष यानाः संसद् लित हयागु खः । तर वय्कलं संसद विघटन पाय्छि धायाबिल, थुकिं जिमित सोचे यायेत बाध्य यानाबिल । संविधान व लोकतन्त्र विरुद्ध जिपिं वनेगु जुइमखु, अथे जुयाः न्हूगु परिस्थिति पिहां वःगु खः । संविधान व लोकतन्त्रया रक्षाया नितिं हाकनं जिपिं छथाय् च्वनागु दु ।’

उकथं हे प्रधानमन्त्री दाहालं राष्ट्रपति संविधान, लोकतन्त्रया रक्षक व राष्ट्रया अभिभावक जूसां वंगु इलय् अथे मजूगु न्ह्यथँसें गठबन्धनपाखें राष्ट्रपतिया उम्मेदवार जुयादीम्ह पौडेलयात कयाः धयादिल, ‘थुगुसी जिमिसं संविधानया महत्व व अन्तर्य थूम्ह, लोकतन्त्रया नितिं ताः ई
क संघर्ष याःम्ह निष्ठावान नेता उम्मेदवार दयेकागु दु । वय्कलं संविधान व लोकतन्त्रया रक्षाया नितिं अभिभावकया भूमिका म्हिती धयागु विश्वास दु ।’

ज्याझ्वलय् न्ववायेगु झ्वलय् कांग्रेसया सभापति शेरबहादुर देउवां राष्ट्रपतिइ रामचन्द्र पौडेलयात त्याकल धाःसा न्हापा थें संविधान खुइगु जोखिम मवइगु दावी यानादिल । वय्कलं आः राष्ट्रपतिया निंतिं पौडेल हे दकलय् योग्य व उपयुक्त उम्मेदवार जूगु खँ न्ह्यथँसें धयादीगु दु, ‘वंगु इलय् राष्ट्रपतिपाखें संविधानया रक्षकया भूमिका म्हितूगु अनुभूति यायेमफुत । आः पौडेलजु राष्ट्रपति जुल धाःसा अज्याःगु जोखिम जुइमखु ।’