धन्य कवि ! धन्य साहित्यकार !

पुल्चोक दमकल न्ह्यःने । मुरारी सिग्देदया पसः । अखबार, विद्यार्थीतय्त माःगु ज्ववलं मीगु । मुरारीजी साहित्यकार । उकिं व पसः जक खयाबी मखु । साहित्यकारत मुनीगु थाय् नं जुइ । विशेष यानाः अन सिनेमा निर्देशक, म्येँ च्वमि, चेतन कार्कीया उपस्थिति न्हियान्हिथं हे जुयाच्वनी । मेम्ह सिने क्षेत्र, संगीत, साहित्य ख्यःया विज्ञ, बहुआयामिक व्यक्तित्व प्रकाश साय्मि नं अन नियमित रुपं थ्यना च्वनी । अथे हे किशोर पहाडी, रामकुमार पाण्डे, माया ठकरीपिं नं सिग्देलया पसलय् इलय् व्यलय् खने दयाच्वनी । पसलय् साहित्यिक माहोल दइगुलिं जि नं आकर्षित जुइगु स्वाभाविक खः। जि नं अन इलं लाइबलय् वनाच्वने ।

नेपाली साहित्यय् न्हू न्हूगु वःगु साहित्यया सफूतय् नं अन सूचना कयाच्वने । जि नेपालभाषा साहित्य ख्यःयाम्ह जूगुलिं जिं अन अक्सर नेपालभाषा साहित्यया बारे हे विचाः प्वंकाच्वने । निगू भाय्या साहित्यया दथुइ इलय् व्यलय् थथे न्यनेकने यायेगु अवसर स्वागत योग्य जुइ । थज्याmगु अन्तक्र्रियां छगू भाषा साहित्यं मेगु भाय्यात थुइकेत तःधंगु ग्वाहालि जुइ ।

छगू विडम्बना ! नेपाली साहित्यय् तसकं नांजाःपिं नेवाः साहित्यकारपिं दु । तर अधिकांश प्रसिद्ध नेवाः साहित्यकारतसें नेपालभाषाय् च्वयेगु मयाः । खः । नेपाली भाषा साहित्यय् च्वयेबलय् तुलनात्मक रुपय् प्रसिद्धि गाक्कं दइ । राष्ट्र भाषा धकाः नेपाली भाषायात च्वय् च्वय् धायेकूगुलिं थथे जूवंगु खः । मल्लकालय् जूसा नेपालभाषां च्वइपिनिगु प्रसिद्धि जुइगु खः । थुकिं छु क्यनी धाःसा भाषा साहित्यया प्रसिद्धि नं शक्तिया निर्भर जुयाच्वनी । तर थौं शक्तिया केन्द्रीकरणया विरोधय् राजनीति विकास जुया वयाच्वंगु दु । शक्तिया आडय् निश्चित भाषा साहित्यया वर्चस्वया अन्त्य जुयाः विविध भाषा साहित्यं थःगु विकासया लँपु स्वतन्त्र नक्सां काये फइगु ई वःगु दु ।

जितः लुमंनि । नेपाली भाषाया नेवाः साहित्यकारतय्त नेपालभाषाय् दुथ्याकेगु, सहभागि यायेगु विचारं बालाजु बनस्थली स्कुलय् नेपाली भाषा साहित्यया नांजाःपिं नेवाः साहित्यकारतय्त मुंकेगु ज्या जुल । तुलसी दिवस, प्रकाश साय्मि, अविनाश श्रेष्ठ, पद्मावती, भागिरथीपिंसं नेपालभाषाप्रति थःगु भक्ति भाव गाक्कं प्वंकादिल । नेपालभाषां नं च्वयेगु प्रण यानादिल । थ्व मुँज्या नेवाः, नेपाली साहित्यकारत व नेपालभाषाया साहित्यकारतय् दथुइ सौहार्दपूर्ण वातावरणय् सम्पन्न जुल । किशोर पहाडी, पद्मावती, भागिरथी श्रेष्ठ, मोहन कायस्थपिंसं नेपालभाषां नं साहित्य श्रृजना याना हल ।

अथे हे पोखरा वनाबलय् सरु भक्तजु, तीर्थ श्रेष्ठजुपिंत नं नेपालभाषाय् रचना यायेत इनाप याना । धरानया साहित्यकारतय्त नं नेपालभाषाय् च्वका । बाग्लुङय् च्वंम्ह साहित्यकार प्रेम छोटां ला देय्न्यंकंया नेवाः साहित्यकारतय् छगू संगठन हे स्थापना यायेगु प्रस्ताव नं तयादिल । नेपालभाषां साहित्य श्रृजना मयासे मयासां थःगु मातृभाषाप्रति देय्न्यंकंया नेवाः साहित्यकारतय्के गाक्कं श्रद्धा दुगु खनेदु । थ्व श्रद्धाभावयात छ्यलाः नेपालभाषा साहित्ययात देय्न्यंकं चकंका यंकेमाःगु ई वःगु दु । भाषा साहित्य धइगु मानवीय विषय नं खः । मानव मात्रया साहित्य श्रृजनायात थःगु खंकाः सयेके सीकेगु स्वयेमाः । थ्व खँय् संकीर्णता काये मजिउ । सफू थुवाः साहित्यकार मुरारी सिग्देलजुया पसलय् जुइगु साहित्यिक संसर्गं नं आनन्द बिउ ।

मुरारीजुया पसलय् साहित्यकार जक मखु, अखबार नं मीगु जूगुलिं अनेक मनूत नं वयाच्वनी । छगू घटना लुमनी । छन्हु पसलय् प्रकाश साय्मि, तुलसी दिवस व जि च्वना च्वनागु । वीरेन्द्र जुजुया सचिव नारायणप्रसादजु अखबार न्याः वल । नारायणप्रसादजु खँ ल्हायेमाःम्ह । पसलय् च्वंम्ह छम्हेसिनं सचिव नारायणप्रसादजुयात हायेके थें धाल, छि राजदूत जुइ धाःगु खः ला ?’ सचिवजुं थःगु स्पष्टीकरण बिसें धाइ, ‘ स्व भाइ ! जुजु सर्वाधिक जूगुलिं जिगु छेँय् हमला यात । खः जिं जुजुयात राजदूत फ्वना । प्रधानमन्त्री कृष्णप्रसादया उपस्थितिइ जुजुं जितः जर्मनीया राजदूत बक्से जुल । जुजुया न्ह्यःने प्रमं ‘जिउ’ धाल । तर कृष्णप्रसादं भट्टराई नं ध्वं लात ।’ अन च्वंम्ह भाई नं सचिवजुयात अनेक सवाल जवाफ यानाच्वन । सचिवजुं नं जवाफ बियातुं च्वन । ‘जिं जुजुयात निरंकुश जुइगु गबलें नं सल्लाह मबिया । जि फ्रेन्च रिभोलुसन, अमेरिकन वार अफ इन्डिपेन्डेन्स ब्वना तयाम्ह …… ।’

सचिव अनं वनी । मेचय् घुसुक्क फ्यतुना च्वंम्ह तुलसी दिवसं धाइ, ‘स्व जि ला सचिव वःसां मदना । जि व प्रकाश साय्मि दनाच्वनागु । तुलसी दिवसं जिमित शान क्यंथें ताल । जिंधया, ‘नारायणप्रसादजु जुजुया सचिव जुइ न्ह्यः त्रिभुवन विश्वविद्यालयया प्रोफेसर, जिमि गुरु । उकिं गुरुयात आदर ला यायेमाल नि ।’ तुलसी दिवसपाखे स्वया धया, ‘धन्य कवि ! धन्य साहित्यकार !’

सम्बन्धित बुखँ

LEAVE YOUR COMMENTS