‘अखण्ड भारत’ या अर्थ छु ?

येँ (नेपालभाषा टाइम्स)- भारतं न्हू दयेकूगु संसद भवनय् तःगु ‘अखण्ड भारत’या नक्सायात कयाः नेपालय् थीथी कथंया न्ह्यसः व सरोकार ब्वलंगु दुसा थीथी दलया नेतातय्सं उकिया आलोचना नं याःगु दु ।

समाजवादी पार्टीया अध्यक्ष डा. बाबुराम भट्टराईं ट्वीटरय् च्वसें अखण्ड भारतया नक्सां नेपाः नापं जःलाखःला देय् लिसे भारतया स्वापू स्यनीगु जकं मखुला धइगु न्ह्यसः ब्वलंगु उगु नक्साया अभिप्राय बारे भारतीय नेतृत्वं लिसः बीमाःगु खँ धयादीगु दु ।

भारतं नकतिनि जक उलेज्या याःगु न्हूगु संसद भवनय् तयातःगु उगु नक्साय् नेपाः, पाकिस्तान लिसें थीथी देय्या भूभागयात भारत दुने दुथ्याकातःगु दु । नक्साय् नेपाःया लुम्बिनी, कपिलवस्तु व पाकिस्तानया तक्षशिला नं भारत दुने लाकातःगु दु ।

डा. भट्टराईं च्वयादीगु दु, ‘अखण्ड भारतया विवादास्पद नक्सां नेपाः लगायत जःलाखःला देशय् अनावश्यक व हानिकारक कुटनीतिक विवाद ब्वलंकी । थुकिं भारतयाप्रति अविश्वास अप्वयेकीगु सम्भावना दु । उकिं भारतीय नेतृत्वं थ्व नक्साया वास्तविक अभिप्राय व प्रभाव बारे इलय् हे खुलासा याःसा बुद्धिमानी जुइ ।’

अथेहे सांसद ठाकुर गैरें भारतया थ्व नक्सा बारे सरकारयात धापू छु दु धकाः न्ह्यसः तयादीगु दु । म्हिगः संसदया पूर्वाधार समितिया बैठकय् वय्कलं थ्व न्ह्यसः तयादीगु खः ।
उकियात लिसः बिसें ऊर्जामन्त्री शक्तिबहादुर बस्नेतं भारतं तःगु नक्सा नेपाः सरकारया नोटिसय् दुगु कनादिल । मन्त्री बस्नेतं भारतया नक्साय् नेपाःया लुम्बिनी व कपिलवस्तु लानाच्वंगु विषयय् जानकारी दु धयादिल ।

उकथं हे नेकपा एमालेया अध्यक्ष केपी शर्मा ओलीं भारतया संसद भवनय् तःगु नक्साया बारे प्रधानमन्त्री पुष्पकमल दाहालं भारत भ्रमणया झ्वलय् खँ तयेमाःगु बिचाः तयादीगु दु ।

म्हिगः अखिल नेपाल महिला संघं याःगु ज्याझ्वःयात सम्बोधन यासें अध्यक्ष ओलीं उगु खँ धयादीगु खः । वय्कलं नक्साया विषयय् प्रधानमन्त्री दाहालं खँ मल्हायेगु खःसा भारत भ्रमणय् वनेगुया औचित्य मदुगु खँ नं धयादीगु दु ।

अथे हे प्रम दाहालया भारत भ्रमण बारे म्हिगः एमालेया मू ज्याकुथिइ जूगु ज्याझ्वलय् न्ववासें एमालेया नेतातय्सं प्रधानमन्त्री दाहालं भारतय् वनाः नेपालं जारी याःगु ‘चुच्चे नक्सा’ या खँ ल्ह्वने माःगु लिसें लिम्पियाधुरा लित कायेगु बारे नं भारतया न्ह्यःने खँ तयेमाः धकाः बिचाः तयादीगु दु ।

प्रधानमन्त्री थौं भारत झाइगु
भारतं संसद भवनय् तःगु न्हूगु नक्साया बारे विवाद जुयाच्वंगु हे इलय् प्रधानमन्त्री पुष्पकमल दाहाल थौं भारत भ्रमणय् झाइगु जूगु दु । प्रम दाहालया थ्व भ्रमणया इलय् भारतलिसे दीर्घकालीन ऊर्जा सम्झौताया कुतः जुइगु खँ परराष्ट्रमन्त्री एनपी साउदं कनादीगु दु । प्रम भारत भ्रमणय् वने न्ह्यः याःगु पत्रकार सम्मेलनय् न्ववासें वय्कलं विद्युत आयोजनाय् भारतीय लगानी आकर्षित यायेगु, ट्रान्समिसन लाइन विस्तार यानाः विद्युत व्यापार अप्वयेकेत भारतया नापं बंगलादेशलिसे नं विद्युत व्यापारया आधार तयार यायेगु खँ कनादिल । उकथं हे नेपालय् उत्पादन जुइगु विद्युत मीगु सुनिश्चितताया कुतः जुइगु खँ नं वय्कलं कनादिल ।