विद्युतीय सवारी साधन संचालनया निंतिं गृहकार्य शुरु

येँ (नेपालभाषा टाइम्स) – बागमति प्रदेश व देय्या संघीय राजधानी स्वायेगु ल्याखं विद्युतीय सवारी साधन चले यायेगु तयारी शुरु जूगु दु । बागमति प्रदेश सरकारं संघीय राजधानीलिसें मेमेगु सहरयात प्रदेशया राजधानी हेटौंडालिसे स्वायेगु ल्याखं सरकारी विद्युतीय बस संचालनया गृहकार्य शुरु याःगु खः ।

बागमति प्रदेशया भौतिक पूर्वाधार व विकासमन्त्री रामेश्वर फुयाँलं प्रदेश अन्तर्गत येँ लगायत थीथी सहरय् विद्युतीय बस व मेमेगु सवारी साधन संचालनया निंतिं प्रदेश सरकारं गृहकार्य शुरु यायेधुंकूगु जानकारी बियादिल । वय्कलं वइगु छुं ईया दुने हे बस संचालन यायेगु जुइ धासें उकिया निंतिं प्रदेश मन्त्रिपरिषद्या बैठकय् प्रदेशया यातायात व्यवस्था संचालन अध्यादेश-२०७७यात स्वीकृत याकेधुंकाः प्रदेशया झिंछगुलिं जिल्लाया ११९ गू स्थानीय तहय् विद्युतीय बस संचालन यायेगु जुइ धयादिल । लिसें वय्कलं विद्युतीय बस संचालनया निंतिं चार्जिब स्टेशन निर्माणया निंतिं पत्राचार नं यायेधुंगु जानकारी बियादिल ।

चार्जिङ स्टेशन लाइन विस्तार यायेत सरकारं नेपाल विद्युत प्राधिकरणलिसे सहकार्य यानाच्वंगु धासें प्रदेशया येँ, यल, ख्वप, धादिङ, मकवानपुर, चितवन लगायतया मेमेगु सहरय् विद्युतीय लाइन विस्तार जुइगु खँ कनादिल । विद्युतीय सवारी साधन तत्काल संचालनया निंतिं प्रक्रियायात सहजीकरण यायेत नेपाल विद्युत प्राधिकरण, नगर विकास कोष, स्थानीय तहलिसे नं सरकारं समन्वया यानाच्वंगु वय्कलं स्पष्ट यानादिल ।