ने. सं. ११४६ बछलागा चौथी -

कर्फ्यूया दथुइ बुंगद्यःया क्षमापूजा

यल- बुंगद्यःया जात्रा याये मफइगु अवस्था वयेवं क्षमापूजाः याःगु दु । शुक्रवाः कर्फ्यूया दथुइ क्षमापूजा जूगु खः ।

बिहीवाः बुगद्यःया रथ सालेमाः धकाः स्थानीय जनता सतकय् वयेवं प्रहरी व स्थानीय जनताया दथुइ ल्वापु जूगु खः । वयां लिपा थीथी जातीय खलः पुचःया मंकाः बैठक च्वनाः बुंगद्यःयात जात्रा मयासें चीहाकःगु विधिं क्वचायेकेत क्षमा पुजा याःगु खः । थुगुसी बुंगद्यःया जात्रा मजूइवं जावलाख्यलय् भोटो क्यनेगु जात्रा नं मजुइगु जूगु दु । बुंगद्यःयात जाउलाख्यलय् थ्यंकूगु प्यन्हु कुन्हु भोटो क्यनेगु परम्परा दु ।

परम्परा कथं बुंगद्यःयात रथय् बिज्याकेधुंकाः न्हापांगु न्हिं कुन्हु पुच्वं गाःबहालय् याः न्यायेकीगु खःसा निन्हु कुन्हु गाःबहालं मंगलय् थ्यंकाः याः न्यायेकीगु खः । स्वन्हु कुन्हु मंगलं लुँहितिइ थ्यंकाः बाराही पूजा यानाः लगंख्यलय् यंकीगु खः । वयां लिपा पाय्छिगु न्हि कुन्हु महाबली बियाः वयां लिपा साइत स्वयां रथयात जाउलाख्यलय् यंकीगु खः ।