चोभारय् न्हू देगः लिसें मेला शुरु

किपू – ०७२ सालया तःभुखाचय् क्षति जूगु चोभाःया लोकेश्वर देगः पुनर्निर्माण लिपा म्हिगः निसें अन लछियंकं न्ह्याइगु मेला नं शुरु जूगु दु ।
तःभुखाचं देगः क्षति जुइवं जीर्णोद्धार यानाः देगः दंगु खः । शुक्रवाः अन आदिनाथ लोकेश्वर द्यः बिज्याकूगु खः । देगः दनाच्वंगु इलय् द्यःयात पिने हे तयातःगु खः ।

दँय्दसं कतिंपुन्हिनिसें चोभारय् मेला जुइ । लछियंकं न्ह्याइगु थ्व मेलाया अन्तिम च्यान्हु देगःया पिनेसं अप्सं च्वनेगु ज्या नं जुइ । थुकियात माय् अप्सं धाइ । खास यानाः थःछेँय् च्वना–च्वंम्ह मिसायात छेँनं काः मवल धाःसा थन च्यान्हु तक अप्सं च्वनीगु व उगु अवधि तक नं काः मवल धाःसा स्वतः हे पारपाचुकूगु माने याइगु चलन दु ।

थौंकन्हय् धाःसा अन थःगु मनया इच्छा पूवंकेगु लिसें थम्हं यानातःगु भाकला पूवंकेगु लागिं नं अप्सं च्वनेगु चलन जुया वःगु दु । च्यान्हु तक छेँय् मवँसे देगःया चःखः हे च्वनेगु व द्यनेगु समेत यानाः च्वनीगु थ्व अप्सं नं कठिन अप्सं मध्ये छगू खः ।