नेपालभाषा परिषद्या बाखं गोष्ठि
यल – नेपालभाषा परिषद्या ग्वसालय् वंगु आइतवाः थनया क्वपुंद्वँय् च्वंगु सातोआकी भवनय् बाखं गोष्ठि जुल । परिषद्या नायः प्रा. सुवर्ण शाक्यया सभापतित्वय् न्ह्याःगु ज्याझ्वलय् वरिष्ठ बाखं च्वमि नापं शिक्षाविद् हितकर वीर सिंह कंसाकार मूपाहांकथं झयादीगु खः ।
ज्याझ्वलय् बद्री वेदना, नरेश अमात्य, माणिक उराय, श्रीमिला सुवाल, राकेश भाजु, मिना वज्राचार्य, ज्ञानीराजा मानन्धर, राजुराम मुनंकःमि, रेणु श्रेष्ठ, दिपना शर्मां थःथःगु बाखं ब्वनाः न्यंकादीगु खः ।
ज्याझ्वलय् नवासे मूपाहां कंसाकार बाखं जक धयां मजिउ धासे बाखनय् विषय दयेमाः अथे खःसां संसारय् विषय मदुगु बाखं नं तसकं लोकंह्वाःगु अनुभूति न्यंकादिल । वय्कलं बाखं च्वये बलय् बाखंयात यइपुसे व न्यने बलय् न्ह्यइपुसे च्वंकेत बाखनय् कलाया प्रयोग यानाः आकर्षक धंगं खँग्वःत छ्यले माःगु व शुरुइ रहस्ययात न्ह्यब्वयाः अन्त्यय् उकियात पितहये फत धाःसा बाखं बांलाइ धयादिल ।
नांजाःम्ह साहित्यकार गोविन्दमान श्रेष्ठं ज्याझ्वलय् न्ह्यब्वःगु दक्वं बाखं बांलाः जू धासे बाखं च्वये बलय् हथासं च्वयेगु मखसे छसिकथं न्ह्याकाः यंकेत स्वयेगु व थथे याये बलय् तःगू विषयय् ततःमतः क्यनीकथं च्वयाः क्वचाये केगु स्वये मजिउ धयादिल ।
ज्याझ्वःया सभापतिया थासं परिषद्या नायः प्रा. शाक्यं दक्वं थासय् मेमेगु भाय् चले जुइधुंकल धइगु सोच तया वन धाःसा झीगु भाषाय् अवश्य नं गतिराेध वइ धासे नेपालभाषायात म्वाका तयेया निंति झीसं थःगु मांभाय्या छ्यलाबुला याये गु त्वःते मजिउ धयादिल ।
ज्याझ्वलय् परिषद्या छ्याञ्जे साहित्यकार धु्र्व मधिकःमिं लसकुस यानादीगु खः ।
LEAVE YOUR COMMENTS