सरकारं यायेमाःगु ७० गू ज्या

येँ – एमाले व माओवादी दथुइ पार्टी एकता मजुयाः सरकारयात पूर्णता बीत हे थाकुयाच्वंसां निगुलिं पार्टीया छगू कार्यदलं धाःसा आः गठन जुइगु न्हूगु सरकारं यायेमाःगु थीथी ज्याया धलः तयार याःगु दु ।

एमाले उपाध्यक्ष वामदेव गौतमया अध्यक्षताय् गठन याना तःगु निगू पार्टीया कार्यदलं आः गठन जुइगु सरकारं यायेमाःगु धकाः ७० गू ज्याया छगू धलः तयार याःगु खः । थुकी खास यानाः कृषि व उद्योगया क्षेत्रय् याये माःगु ज्याया नापं थीथी कानूनय् सुधार यायेमाःगु खँ नं दुथ्यानाच्वंगु दु ।

सूत्रतय्सं धाः कथं प्रशासनय् तसकं विवादय् लानाच्वंगु खरिद ऐनय् समेत सुधार यायेगु प्रस्ताव दुथ्यानाच्वंगु दु । विकास निर्माणया ज्याय् थ्व खरिद ऐनया कारणं न्ह्यागु ज्या नं ढिला जुइगु जुयाः थ्व ऐनयात छुं भचा सुस्त यायेगु कथं कानून सुधारया लागिं नं प्रस्ताव यानातःगु दु ।

थुकी खास यानाः आः वइगु न्यादँया दुने सरकारं यायेमाःगु ७० गू ज्याया धलः दुथ्याकातःगु दु । थुकी जनतायात माःगु गुलिखे मौलिक हक सम्बन्धी कानून सुधार यायेमाःगु खँ नं दुथ्याका तःगु दु ।

थ्व खास यानाः चुनावया इलय् एमाले व माओवादीं जारी याःगु मंकाः चुनावी घोषणापत्रय् दुथ्यानाच्वंगु बुँदाय् आधारित सुझाव खःसां थ्व धलः तयार यायेगु लागिं थीथी विकासविद्त व विज्ञत समेत तयाः ज्या यानागु खँ नं धाःगु दु ।