नेपाली समाज अझ हे पुरातनवादी तिनि । सुयां ब्याहा जुयाः निदँ स्वदँ तक नं मचा मंत धाःसा छाय् मदुगु जुइ, छु जुयाः मदुगु जुइ धकाः चेवा कायेधुंकी । मिसा वा मिजंयाके छुं शारीरिक समस्या जकं दु लाकि धकाः नागःतुगः याना हइसा भचा पुलां बिचाः दुपिंसं ला मिसायात मचा बुइके मफुम्ह धकाः हेला समेत याना हयेधुंकी ।
तःदँ तक मचा मंत कि निम्हतिपू नं चिन्तित जुयाः उखेंथुखें क्यं जुइ । छम्ह मचा दयेकेत लखौं दां खर्च याः जुइ । मचा मदुपिं गुलिखे विदेशीत नेपालय् ‘सरोगेट मदर’ पाखें मचा दयेकेत वयाच्वंगु खँ नं सकस्यां सिउगु हे जुल । सरोगेट मदरपाखें मचा दयेकेत छगू करोड तका तक खर्च याइपिं विदेशीत नं दु ।
मचा मदयाः चिन्तित जुयाच्वंपिं थज्याःपिं हे तिपूतय्गु सेवा याना वयाच्वंम्ह छम्ह सेवक खः भाजु गुञ्जमान शाक्य । उमेरं थौंकन्हय् ७० दँय् क्यनाच्वंम्ह वय्कलं निःसन्तान तिपूयात मचा दयेकेगु सेवा शुरु यानादीगु धाःसा ३५ दँ दत । वय्कःया थ्व सेवा थौंतक नं जारी दनि । नेपाःया ततःधंगु अस्पतालय् वनाः लखौं ध्यबा खर्च यानाः नं मचा मदुपिं आपालं तिपूतय्त वय्कलं मचा दयेकाः कल्याण यानादीगु दु ।
थौंकन्हय् नेपालय् नं निःसन्तान तिपूया लागिं तःथाय्मछि ‘टेष्टट्यूब’ बेबीया सेवा शुरु जुइधुंकल । थुकिं यक्वसित सन्तान दयेका बियाच्वंगु नं दु । तर अनं नं सकसिनं मचा दयेका हे बी धइगु ग्यारेन्टी मदु । थज्याःगु थासय् वनाः नं सफल मजूपिं गुलिखे तिपूतय्त धाःसा वय्कलं मचा मदयेका बियाच्वंगु दु ।
मचा मदुपिंत मचा दयेका बीगु आः झीथाय् छगू व्यवसाय जुइधुंकल । तर वय्कःया लागिं धाःसा थ्व व्यवसाय मखु, सेवा खः । वय्कलं थुकिया लागिं मेपिंसं थें लखौं तका शुल्क नं काइ मखु । मचा मदयाः थःथाय् वइपिं मनूतय्त दकलय् न्हापां उमिगु सम्पूर्ण फाइल अध्ययन यानादी ।
अप्वः यानाः ला गन गन वनाः नं मजिउपिं वय्कःयाथाय् वयेगु याइ ।यदि मिसाया कारणं मचा मदुगु खःसा गाइनोयाथाय् छ्वया बी । मिसातय् ट्यूमर जूसा, हार्मोन गोलमाल जूसा, ट्यूब ब्लक जूसा, लः जमे जूसा (फाइब्रासिस जूसा), महिनावारी गोलमाल जूसा, थाइराइड जूसा प्वाथय् मचा मच्वनेयः ।
पाठेघरया टिबी, क्यान्सर जूसां नं मचा मदयेफु ।उमिगु उपचार नं गायनों यानाबी । मिजंया कारणं मचा मदुगु खःसा वयागु उपचार धाःसा वय्कलं यानादी । गुलिखे मिजंतय् मचांनिसें हे शुक्रकीट मदइपिं नं दइ । तःकै वःपिं मिजंतय् शुक्रकीट सीगु जुयाच्वनेफु । ‘मम्स्’ धाःगु ग्लाय्न्ट दत धाःसां नं मचा दइमखु ।
छातिया टिबी जुल धाःसां नं कडागु वासः नयेमालीगु जूगुलिं शुक्रकीट नष्ट जुया वनी । जण्डिस, टाइफाइडया यक्व वासः नःपिं, चुरोट, अय्लाः यक्व त्वनीपिनि नं शुक्रकीट स्यनी । उमि नं मचा दइमखु । अज्याःगु केशय् वय्कलं निम्हेसियां सहमति कयाः मिसाया पाठेघरय् शुक्रकीट पास यानाबी । गुलिसितं डोनर व थःहे भाःतया शुक्रकीट मिक्स यानाः नं तयाबीगु यानाबिउ ।
थुकिया लागिं वय्कलं थिकेगु वासः नं नकी मखु, घाः नं याइ मखु, सास्ति नं नकी मखु । वय्कलं मुख्य याइगु धइगु डिम्ब पिहां वयाच्वंगु इलय् शुक्रकीट पास याना बीगु जक खः । थथे यायेगु वय्कःया थःगु हे विधि दु । थुकियात ‘आर्टिफिसियल फेलोपिन ट्यूब पास्ट’ अर्थात पाठेघरय् कृत्रिम ढंगं शुक्रकीट छ्वयेगु विधि धाइ ।
उपचार याये न्ह्यः वय्कलं कलाःभाःत नापं तयाः घन्टौं तक काउन्सिलिङ निं यानादी । लिसें थःगु वासः यायेगु तरिका बारे नं कनादी ।
ओम नर्सिङ होम, निदान अस्पताल आदि थासय् वनाः नं मजिसेंलि लिहां वःपिं वय्कःयाथाय् वइ । गुलिं चाहिँ ब्याहाः यानाः ८—९ दँ तक मचा मदुपिं नं वइ ।
एन्डु केयर दक्षिण भारत हैदरावाद, हिमाल अस्पताल, शुभेच्छा अस्पताल, ग्राण्डी सिटीइ आइभीएफ यानाः नं फेल जूम्ह येँया भुइख्यलय् च्वंम्ह खड्गी जातयाम्ह छम्ह मिसायात वय्कलं मचा दयेकाबिल । ०६८ सालय् ब्याहा याःम्ह उम्ह मिसां ०७४ सालय् तिनि मचा बुइकूगु खः । वय्कःयाथाय् येँ, ख्वप, यल, पर्वत, धनगढी, धादिङ, इलाम, झापा, विराटनगरयापिं मनूत तकं वयेगु याः ।
वय्कलं कृत्रिम गर्भाधान यानाः बूपिं गुलिखे मस्त आः ब्याहा यानाः नं वनेधुंकल ।तःथाय् तःदँ तक क्यनाः नं मजिसेंलि वय्कःयाथाय् वइगु जूगुलिं गुलिखे मिस्तय् उमेर हे वनेधुंकी । तर नं वय्कलं जित्तले कुतः यानादी । ३६ दँ तक दुम्ह मिसायात नं वय्कलं गर्भाधान याना बिउगु दु ।
मिजंया शुक्रकीट कमजोर जुयाः वा ‘डेमेज’ जुयाः गर्भाधान जुइगु अवस्था हे मंत धाःसा कर्पिनि वीर्य हयाः मचा दयेकेगु बाहेक मेगु उपाय मदु । उकिया लागिं वय्कलं थःगु हे कथंया छगू ‘वीर्य बैंक’ या नं व्यवस्था यानातःगु दु । मचा बुइकीपिं तिपू छु जातियापिं खः वहे जातिया वीर्य वय्कलं व्यवस्था यानाबी ।
नेवाः तिपूयात नेवाः, क्षेत्री–ब्रम्हू तिपूयात क्षेत्री–ब्रम्हू, राई लिम्बुयात राई लिम्बुया हे वीर्य हयाः तयाबी ।निःसन्तानयात सन्तान दयेकाबीगु थ्व ज्या वय्कलं छुं विशेष अध्ययन यानाः सयेकादीगु मखु । वय्कलं परिवार नियोजन ज्याकुथी २५ दँ तक ज्या यानादीगु दु । अन मचा मदयाः वइपिं आपालं तिपूत व उमिगु दुःख वय्कलं खंकादिल ।
वय्कलं रुसय् प्यदँ तक ‘मेडिकल एण्ड प्याथल्याब’ ब्वनादिल । माइडोल युनिभर्सिटी बैंककय् नं अध्ययन यानादिल । परिवार नियोजनय् च्वँच्वं हे छम्ह महर्जन मिसायात वय्कलं कृत्रिम गर्भाधान यानादिल । थ्व कुतः सफल जुइवं वय्कःयाके आँट नं वल । अनं लिपा वय्कःया थ्व सेवा अनवरत शुरु जुल । कृत्रिम गर्भाधानय् मिसाया मचाछेँय् मचा च्वनेवं जक सफल जुइगु मखु ।
आपालं केश असफल हे जू वनी । तर मेमेगु तःधंगु अस्पतालं याइगु ज्या स्वयां थःगु सफल प्रतिशत अप्वः दुगु वय्कःया दावी दु । आः तक वय्कलं द्वःछि स्वयां अप्वः मिस्तय्त कृत्रिम गर्भाधान यानादीगु दुसा थुपिंपाखें १५० स्वयां अप्वः मचा बुइकेधुंकूगु दु ।थौंकन्हय् येँया भोताहितिइ पुलांगु वाणिज्य बैंक वनेगु गल्लिइ वय्कःया ‘निःसन्तान क्लिनिक’ सञ्चालन जुयाच्वंगु दु ।
स्वयेबलय् चिकिचाधं । तर अन सृष्टिया ज्या जुइ । वय्कःया सुं कर्मचारी नं मदु । याकःचां हे वासः यानादी । थ्व ज्याय् गोप्यताया तःधंगु भूमिका दु । कर्मचारी दत धाःसा गोप्यताय् लिच्वः लायेयः । व्यक्तिगत रुपं वय्कः थ्व ज्या याना च्वनेमाःम्ह मखयेधुंकल । तर नं सेवा भावं थम्हं सःगु ज्ञानया आधारय् सेवा बिया च्वनादीगु दु ।
मचा मदु धइगु कारणं ब्वलनीगु पारिवारिक, सामाजिक, मानसिक समस्यापाखें सुयातं मुक्त याना बी दत धाःसा व ति तःधंगु आनन्द मेगु मजुइगु वय्कःया बिचाः दु ।
न्ह्यब्वःम्ह : सुरेश
LEAVE YOUR COMMENTS