लिभिङ टुगेडरय् घरेलु हिंसा अप्वः
येँ – ब्याहा मयासें लिभिङ टुगेडरय् च्वनाच्वंपिं मिस्त अप्वः घरेलु हिंसाया शिकार जुयाच्वंगु दु । ब्याहा मयासे मिजं पासालिसे नापं च्वनाच्वंपिं मिस्त थौंकन्हय् थः घरेलु हिंसाय् लात धकाः महिला आयोगय् उजूरी तःवनेगु अप्वया वनाच्वंगु दु । लिभिङ टुगेडरय् च्वनाच्वंपिं मिस्तय्त घरेलु हिंसा जूसां उमिगु सम्बन्धयात कानुनी मान्यता मदुगुलिं कानुनी उपचार मालेत नं थाकुयाच्वंगु दु ।
थज्याःगु मुद्दा स्वयाच्वंम्ह छम्ह अधिवक्ता विमला खडकां निम्ह दथुइ औपचारिक स्वापू खनेदइगु प्रमाण छुं मदुगुलिं मुद्दा ल्वायेत तकं थाकुयाच्वंगु खँ धयादीगु दु ।वय्कःया कथं हिंसाया कारणं कानुनी उपचार नं कायेमफुगु व पीडा नं सह यायेमफुगु कारणं यक्व मिस्त आत्महत्या यायेगु अवस्थाय् थ्यनाच्वंगु दु ।
घरेलु हिंसापाखें औपचारिक रुपं ब्याहा यानातःपिं यक्व हे मिस्त नं पीडित जुयाच्वंगु दु । तर ब्याहा यानातःपिं मिस्त धाःसा अप्वः धइथें मिलापत्र यायेत हे तयार जुइगु खँ कानुन व्यवसायीतय्सं धाःगु दु । ‘ब्याहा यानागु स्वीदँ तक भाःतं दाया हे च्वंसां उमिसं हाकनं मिलापत्र यायेत हे खँ ल्हाइ’ मेम्ह छम्ह अधिवक्तां कंगु दु ।
मिस्त आर्थिक रुपं सक्षम जुइमखु, अले मस्त नं मांपाखे हे आश्रित जुयाच्वनी । अथे जूगुलिं थज्याःपिं मिस्त थःत पीडा बिउम्ह भाःतयात कारवाही याकेगु स्वयां मानाचामल भरे यायेगु धायेवं लय्तायाः मुद्दा बन्द यायेत तयार जुयाच्वंगु दु ।
राष्ट्रिय महिला आयोगया कथं थगुने जक प्यसःगू घरेलु हिंसा सम्बन्धी उजुरी दर्ता जूगु खः । तर थ्व मध्ये यक्व धयाथें मुद्दा अदालत तक हे थ्यंगु मदु ।
LEAVE YOUR COMMENTS