साब्वंया फिँज छाय् तुइसे च्वनी ?
साब्वं छगू अज्याःगु वस्तु जुइ धुंकूगु दु, गुगु झीगु न्हिथंया जीवनय् मदयेक मगाः । सुथय् दनेवं ख्वाः सिलेगुनिसें कयाः बहनि ब्यलि यानाः द्यनेगु इलय् तकं साब्वंया छ्यलाबुला उतिकं जुयाच्वनी । ल्हाः–तुति सिलेतनिसें कयाः म्वःल्हुइत, वसः हीत तकं साब्वं हे माः । बजारय् अनेकथंया साब्वं न्यायेगु दु । अनेककथं नस्वाः वइगु साब्वनंनिसें कयाः थीथी रंगया साब्वं बजारय् न्यायेगु दु । साब्वंया नस्वाःयात त्वःताः धायेगु खःसा न्ह्याथें जाःगु रंगया साब्वं छाय् मजुइमा, उकियात छ्यलेबलय् उकिं गुगु फिंज पिहां वइगु खः, व धाःसा तुइसे हे च्वनी । साब्वनं थायेबलय् उकिया रंग गन वनी, अले गथे जुयाः तुयुगु फिँज जक पिहां वइ ? थ्व गबलें विचाः यानादीगु दु ला ?
साब्वनं थायेबलय् पिहां वःगु गुगु फिँज खः उकिया बारे सीकेगु खः धइगु जूसा दकलय् न्हापां छि मचा जुयादी माली, अले स्कुलया ईयात लुमंकेमाली । खँ साधारण हे खः ।स्कुलय् ब्वनेगु इलय् धाःगु खः कि छुं नं वस्तुया रंग दइमखु । जब उकिं निभाःया जः (प्रकाश) लाइ, उकिइ रंग परिवर्तन यायेगु क्षमता दइ, अले उकिया रंग नं अथे हे जुइ । उगु नियमयात लिधंसा कयाः धायेगु खःसा जब छुं नं वस्तुं रंग परावर्तन याये फइमखु, उकिया रंग हाकुसे च्वनी । अले गुगु वस्तुं दक्वं रंगयात पराजर्तन याये फइ उकिया रंग तुइसे च्वनी ।
खः साब्वंया फिँजय् नं थ्व हे नियम लागू जुइ । साब्वं छगू ठोस वस्तु खःसां उकिं पिहां वइगु फिँज गुगुं ठोस पदार्थ मखु । फय्, लः व साब्वंया छगू चिधंगु अंश मिले जुयाः पिहां वइगु छताजि सालुगु पदार्थ हे फिँज खः । अले थ्व हे पदार्थं साब्वंया चिचिधंगु फिँज मिले जुयाः हे तःधंगु फिँजया आकार काइगु खः । अले व छगू कथंया पारदार्शी व सप्तरंगी नं जुइ ।
LEAVE YOUR COMMENTS