प्रियंकाया म्हुतुसि

थ्व इलय् बलिउडय् नायिका प्रियंका चोपडाया चर्चा भचा अप्वः हे जुयाच्वंगु दु । तर थ्व चर्चा वयागु न्हूगु संकिपा, न्हूगु लुक्स वा अज्याःगु छुं कारणं धाःसा मखु । प्रियंका आः न्हापायाम्ह प्रियका थें खने मदु धइगु खँयात कयाः चर्चा जुयाच्वंगु खः ।
थःगु म्हुतुसि व न्हाय्या प्लाष्टिक सर्जरी लिपा वयागु ख्वाःया ढाँचाय् छगूकथंया हिउपाः वःगु व न्हापा थें बांलाः मजू धइगु कारणं वयागु चर्चा जुयाच्वंगु खः ।

वास्तवय् प्रियंकां थःगु म्हुतुसियात हलिउड नायिका जुलिया रोबर्टसया थें दयेकेत स्वयाच्वंम्ह खः अले वयात थःगु हे न्हाय् नं मययाच्वंगु खः । थ्व खँ धाःसा गाक्कं पुलां । गुगु इलय् प्रियंका मिस वल्र्ड जुल, वयां लिपा खुला तक धइथें व वेपत्ता जुल । व हे इलय् व सुतुक्क धायेक लन्डन वनाः थःगु न्हाय् व म्हुतुसिया प्लाष्टिक सर्जरी याकूगु खः ।

प्रियंकां गुगु विचाः यानाः सर्जरी याःगु खः, अथे धाःसा मजुल । वयागु न्हाय्या च्वका हे स्यन । म्हुतुसि नं भद्दा जुयाबिल । गुकिं यानाः वं छुं छुं फिल्मय् म्हितेगु ह्वःताःतकं त्वःफिकेमाःगु खः ।

थ्व खँ प्रियंका बारे च्वयातःगु आःनकतिनि पिहां वःगु छगू सफुलिइ न्ह्यथनातःगु दु । पत्रकार भारती प्रधानं च्वःगु सफुलिइ उगु खँ न्ह्यथनातःगु खः ।