
न्हूम्ह सचिव वःसां मेलम्चीया समस्या अथे हे
येँ – ज्या त्वःताः बिसिउँ वंम्ह मेलम्ची खानेपानी आयोजनाया इटालियन ठेकेदार सीएमसीयात हानं लित हयेगु वा महयेगु धइगु खँय् खानेपानी मन्त्रालय दुने विवाद पिहां वःगु दु ।आयोजनां ठेक्का त्वःताः वनेधुंकाः मेलम्ची आयोजनायात याकनं क्वचायेकेगु धकाः खानेपानी मन्त्री विना मगरं सीएमसीयात लित हयेगु कुतः याःगु खःसां मन्त्रालयया कर्मचारीत धाःसा उकिया विरोधय् वनाच्वंगुलिं थ्व विवाद ब्वलंगु खँ सीदुगु दु ।
थःगु खँ मन्यन धकाः मन्त्री मगरं तत्कालीन सचिव गजेन्द्र ठाकुरयात सरुवा याना छ्वःगु खः । तर ठाकुरयात सरुवा यानाः हःम्ह न्हूम्ह सचिव नं सीएमसीयात लित हयेगु पक्षय् मदुगु खँ सीदुगु दु । सचिवया लिसें मन्त्रालयया आपालं कर्मचारीत नं सीएमसीयात लित हयेगु पक्षय् मदुगुलिं अन विवाद ब्वलंगु खः ।
मन्त्री मगर धाःसा अझ नं सीएमसीयात हे लित हयेगु धकाः अडान कयाच्वंगु दु । तर मन्त्रालयया कर्मचारीतय्सं धाःसा उकियात अस्वीकार यानाच्वंगु दु । मन्त्रालय सूत्रया कथं कर्मचारीतय्सं कानुनी रुपं सम्भव मदुगु धासें सीएमसी लित हये फइमखु धकाः अडान कयाच्वंगु दु ।
सूत्रया कथं सीएमसी लित हयेगु बारे सहलह यायेत मन्त्री मगरं मेलम्ची खानेपानी विकास समितिया बैठक सःति धकाः निर्देशन बिउसां नं बैठक च्वनेगु तयारी तकं कर्मचारीतय्सं यानाच्वंगु मदु ।
समितिया बैठकं निर्णय मयाःतले सीएमसीयात लित सःते मफइगु जूगुलिं कर्मचारीतय्सं बैठक हे मसःतेगु ज्या यानाच्वंगु सूत्रया दावी दु ।
मन्त्री व कर्मचारीतय् दथुइ ब्वलंगु थ्व विवादं मेलम्ची आयोजना धाःसा झन् हे अन्यौलय् लाःवंगु दु । सूत्रया कथं मन्त्रीया प्रस्तावयात कयाः कर्मचारीत असहमत जुयाच्वंगु जक मखु गुगुं नं हालतय् निर्णय मयायेगु धकाः अडान हे कयाच्वंगु दु ।
मन्त्री मगरं न्हूगु प्रक्रियां मेलम्ची आयोजना दयेकेगु लँपुइ वन धाःसा मेलम्ची हयेत ताः ई काइगु जुयाः पुलांगु कम्पनीयात हे ज्या बीमाः धकाः थःगु दुत छ्वयाः सिंगापुरय् वार्ता याके छ्वःगु खःसा उगु वार्ता लिपा सीएमसी लिहां वइगु सम्भावना नं अप्वःगु खः । कर्मचारीत धाःसा थःत सरुवा याःसां नं सीएमसी लित हयेगु पक्षय् मदुगु खँ सूत्रं धाःगु दु ।
बरु कर्मचारीतय्सं आः न्हूगु ढंगं न्ह्यायेमाःगु अडान कयाच्वंगु दु । कर्मचारीया थुगु अडान गनं मेगु कमिसनया खेल जकं मखुला धइगु न्ह्यसः नं ब्वलनाच्वंगु दु । सीएमसीं क्षतिपूर्ति, बोनस, पुलांगु ल्यं दनिगु बक्यौता सहित १ अर्ब ५० करोड भुक्तानी याःसा न्हय्न्हुया दुने लिहां वयेगु प्रतिवद्धता प्वंकाच्वंगु दु ।
सीएमसीं मेलम्चीया ज्या यायां वंसां वयात भुक्तानी बीगु सवालय् धाःसा पुलांम्ह सचिवं कमिशन फ्वंगु जुयाः ज्या हे याये मफयाः बिसिउँ वंगु खँ चर्चाय् वयाच्वंगु दु ।
LEAVE YOUR COMMENTS