थिमिइ बालकरामं म्ये प्वाः खन

थिमि – येँयाःया इलय् येँय् च्वंपिं कुमारिया खः थःनेपाखे सालाः न्ह्यइपुका च्वंगु इलय् उखे मध्यपुर थिमिया वासिन्दात धाःसा म्येँ प्वाः खनेगु जात्राय् मग्न जुयाच्वन । मध्यपुर थिमिइ दँय्दसं बिस्काःया इलय् बोडेय् म्ये प्वाः खनेगु जात्राया बारे ला यक्वसिनं न्यना वयाच्वंगु हे खः । तर, थन दँय् छक्वः जक मखु निक्वः म्ये प्वाः खनेगु याइ ।

बिस्काःया इलय् बोडेय् थें हे येँयाःपुन्हिकुन्हु मध्यपुर थिमिइ नं उकथं हे म्ये प्वाः खनेगु जात्रा जुइ । बोडेय् न्हिनसिया इलय् म्ये प्वाः खनेगु याइसा थिमिइ धाःसा द्यः खिउँसे च्वने धुंकाः म्ये प्वाः खनेगु जात्रा जुइ । थुगुसी मध्यपुर थिमि नगरपालिका वडा नं. ५ चोडे त्वालय् च्वंम्ह बालकराम श्रेष्ठ (४० दँ) म्ये प्वाः खनादिल ।

वंगु मंगलवाः येँयाःपुन्हिकुन्हु बहनिसिया ८ ताः इलय् वय्कलं थिमिया दिगु भैलः द्यःया देगः न्ह्यःने च्वंगु मण्डपय् म्ये प्वाः खनादीगु खः ।
म्ये प्वाः खने न्ह्यः थिमि लाय्कूया नायः पःमांत वनाः जुजुया प्रतीककथं खड्ग ज्वनाः वःगु छुं ई लिपा म्ये प्वाः खंगु खः ।

बालकरामं म्ये प्वाः खनेवं थिमिया थथुसाः (थःने) व क्वथुसाः (क्वःने)या साय्मितय्सं ताःहाकःगु पँथय् त्रिशुल आकार थें खने दुगु यांमतः च्याकाः न्ह्यःने न्ह्यःने वयेवं म्ये प्वाः खनादीम्ह बालकरामं चन्द्राकारया भ्वाय् (महाद्वीप) कुबियाः नगरपरिक्रमा यानादीगु खः । नगरपरिक्रमा यायेगु झ्वलय् थिमिया बालकुमारि जुयाः बोडेय् तकं वंगु खः ।

थथे म्ये प्वाः खनीम्ह थ्व हे लागा तक वनेमाः धइगु छुं नियम मदुगु व थःगु इच्छाकथं मं दुथाय् तक वनेगु वनीगु संचारकःमि केके मानन्धरं ‘नेपालभाषा टाइम्स’यात कनादिल । वय्कलं धयादीकथं न्हापा म्ये प्वाः खनादीम्ह थिमि, नगदे, बोडे लगायतया थासय् चाःहिलाः नं पशुपति तक नं वंगु जानकारी बियादिल ।

तःदँ न्ह्यःतक पशुपति, गुहेश्वरी, चाँगुनारायणतक नं वनेगु याःसां थौंकन्हय् धाःसा मध्यपुर थिमिया थीथी त्वालय् जक चाःहिलेगु याइ । म्ये प्वाः खंम्ह नगरपरिक्रमा यानाः लिहां वयाः बालकुमारि द्यःयाथाय् थ्यंकाः म्ये प्वाः खंगु मुलु लिकयाः देगःया हे थामय् ताना बीवं जात्रा क्वचाइ ।

करिब स्वसःत्या दँ पुलांगु थिमिया ऐतिहासिक म्ये प्वाःखनेगु जात्रा २०६३ सालंनिसें दिनाच्वंगु खःसा थगुनेनिसें थुकियात हाकनं निरन्तरता बिया हःगु खः । थगुने बालकुमारिया ३० दँ दुम्ह विरेन्द्रभक्त गजु श्रेष्ठं म्येँ प्वाः खनाः दिनाच्वंगु परम्परायात निरन्तरता बियादीगु खः । बोडेय् थें हे थिमिइ नं म्ये प्वाः खनीपिं श्रेष्ठ थरयापिं हे जुइमाःगु चलन दु ।

थिमिया म्ये प्वाः खनीगु जात्राय् छक्वःया पालय् नीन्हय्म्हेसिनं तक म्ये प्वाःखंगु सीदुगु दु । करिब २५ दँ न्ह्यःनिसें लोप जुइगु अवस्थाय् थ्यने धुंकूगु मध्यपुर थिमिया ‘येँयाःपुन्हिया म्ये प्वाः खनेगु जात्रा’ २०५२, २०५७ व २०६३ सालय् कृष्ण नानीचा श्रेष्ठं म्ये प्वाः खनादीगु खः । वय्कलं झिक्वःतक म्ये प्वाः खनादीधुंकूगु दु ।

किंवदन्तीकथं प्राचीनकालय् मध्यपुर थिमिया वासिन्दातय्त भूत, प्रेत, पिशाच, कवं, ख्याकं दुःख बीगु यायेवं तान्त्रिक शक्तिपाखें ज्वनाः म्ये प्वाः खनाः नगरपरिक्रमा यायेवं दुःख बीगु त्वतूगु व वयां लिपा थ्व जात्रा संचालन जूगु धइगु धापू दु । म्येँ प्वाः खनीगु दिं कुन्हु म्ये प्वाः खनीम्ह नापं वया छेँजःपिं सुनानं लः त्वनेगु बाहेकं मेगु छुं नं नसाज्वलं नये मजिउगु व जात्रा सिधयेकाः लिहां मवःतले द्यने तकं मजिउ धइगु मान्यता दु ।